GIBUTYAG sa Department of Health (DOH) 7 sa Martes, Agosto 24, 2021 nga ang 19 ka mga natala nga kaso sa Delta variant pulos anaa sa Lalawigan sa Sugbo, mga dakbayan sa Cebu ug Lapu-Lapu.
Base sa pahibawo sa DOH 7 nga ang pito gikan sa Cebu Province, unom sa Cebu City ug laing unom sa Lapu-Lapu City.
Sa pito ka Delta cases sa lalawigan sa Sugbo, gilangkuban sa lungsod sa Samboan nga adunay tulo, ug adunay tagsa ka kaso sa San Fernando, Boljoon, Talisay City ug Argao.
Si Dr. Eugenia Mercedes Cañal, DOH 7 Regional Epidemiology and Surveillance Unit head, nagkanayon nga adunay kinatibuk-ang 268 samples ang ilang napadala niadtong Hulyo 7-30.
Base sa ilang labing uwahing talaan, anaa na sa 59 ka Delta variants nga na-detect sa Central Visayas ug lakip na sa ihap ang 19 ka bag-ong na-report.
“All of the 59 cases have been endorsed to their respective LGUs (local government units). All have finished their mandatory quarantine but are still monitored,” matod pa ni Cañal.
Dugang pa ni Cañal nga moabot ngadto sa 14 ka returning oversees Filipinos (ROFs) nga nagpositibo sa Delta variant.
Ang mga ROFs nga nitugpa sa Ninoy Aquino International Airport gipaubos na sa kuwarantina sa wa pa mobiyahe pauli sa Sugbo ug gi-endorse ngadto sa hingtungdan nga LGUs alang sa monitoring.
Ang 14 ka ROFs naglakip niadtong duha nga taga-Bohol (usa sa Talibon, usa sa Candijay), walo niini sa Cebu Province, usa sa Cebu City, duha sa Lapu-Lapu City ug usa sa Siquijor.
Ang DOH nagtuo nga duna nay lokal nga mga pagpanakod sa Delta variant dinhi sa nasod, apil na sa Sugbo, tungod sa paspas nga pagsaka sa mga kaso.
Ang labing daghan nagagikan sa National Capital Region ug Calabarzon.
Sa mga variant sa Covid-19, ang Delta maoy naproblemahan sa mga nasod sa kalibutan tungod kay mas mananakod kini.
Gipilo og labing minos katulo ang kapaspason sa iyang pagpanakod kon itandi sa ubang variants sa Covid-19.
Naproblema ang mga kagamhanan tungod sa kadaghan usab sa nangamatay niini, labina sa India diin nagagikan kining mao nga variant.
Dinhi sa Sugbo, daghan sa mga tambalanan hapit na mangapuno sa mga pasyente sa Covid. (WBS, FVQ)
0 Comments