Gipahimuslan sa Jumbo Plastic-Basilan ang pagkawagtang sa tulo ka sinaligan sa KCS Computer Specialists sa dihang ilang gikulit ang yanong kadaugan, 94-67, sa Game One sa Pilipinas VisMin Super Cup best-of-five Southern Finals Miyerkules Agusto 11, 2021 sa Pagadian City Gymnasium, Zamboanga del Sur.
Ang Computer Specialist kansang mga sinaligan nga sila si Ping Exciminiano, top scorer Gryann Mendoza, ug Al Francis Tamsi di na makaduwa sa finals, mao man tuoy nakaunag pugnit og puntos apan mao ra usab kadto ang bugtong higayon nga sila nakalabaw.
Daling nakabulhot ang Peace Riders ug ila gilayong giposte ang 44-31 nga bintaha pagsira sa halftime.
“Noong first half, we couldn’t pull away kasi on some plays disorganized kami sa executions. Sinabihan ko lang sila na just follow the pattern sa executions at mas tigasan pa ang depensa,” matod ni Basilan head coach Jerson Cabiltes.
Dili pa igo, mipahagsa ang Basilan og 16-3 nga rally sa third period, nga giduslitan ni Michael Mabulac sa ilawom nga bahin, ug dinhi mibukad og maayo ang ilang bintaha, 60-34, 6:15 ang nahabilin sa third period.
Ang Finals MVP sa Mindanao Leg nga si Chris Bitoon ug sa gihapon misilaw og maayo nga mirehistro og 19 puntos, tulo ka assists ug duha ka steals aron pangulohan ang Basilan.
Gawas kang Bitoon, laing lima ka mga Peace Riders ang mitapos sa duwa nga naka double figure. Si Juneric Baloria mitali og 13 puntos, Mabulac mipakli og 11, tag 10 puntos usab sila si Philip Manalang, Michael Juico ug Bobby Balucanag.
Sa habig sa KCS, ang guard nga si Steve Castro mitapos sa duwa nga may 18 puntos, lima ka rebounds ug duha ka assists. Mitimang kaniya sa opensa ang bag-ong recruit nga si Miguel Gastador kinsa mipugnit usab og 11 puntos.
Ang Game 2 ipahigayon sa alas 6 sa hapon sa Huwebes, Agusto 12, 2021 diin mosuway sa pagbawos ang KCS aron pagtabla sa series.
Ang mga puntos:
Basilan (94) – Bitoon 19, Baloria 13, Mabulac 11, Balucanag 10, Manalang 10, Juico 10, Bringas 6, Hallare 6, Gabo 5, Collado 2, Taganas 2, Uyloan 0, Saliddin 0, Tan 0, Siruma 0.
Mandaue (67) – Castro 18, Gastador 11, Soliva 6, Sorela 6, Cachuela 6, Nalos 5, Bregondo 5, Roncal 3, Bautista 3, Delator 2, Imperial 2, Octobre 0, Mercader 0.
Quarterscores: 24-11, 44-31, 75-46, 94-76. (JBM)
0 Comments