GITAKTAK pagka job order nga kawani ang drayber sa city administrator sa Dakbayan sa Mandaue human kini nanukmag og traffic enforcer sa Traffic Enforcement Agency of Mandaue (Team) pasado alas 2 sa hapon sa Miyerkules, Agusto 25, 2021 sa eskina sa Pagsabungan ug Barangay Basak, Mandaue City.
Mao kini ang gibutyag ni Team executive director Edwin Jumao-as sa interbyu sa Superbalita Cebu sa Agusto 26, 2021.
Si Jumao-as niingon nga gipakita siya ni City Administrator Jamaal James Calipayan sa memorandum nga nagtaktak sa trabaho kang Mark Lester Santos isip JO human sa imbestigasyon sa hitabo.
Si Jumao-as niingon nga sa Huwebes sa buntag, gipatawag ni Calipayan sila si Santos ug traffic enforcer Nathaniel Mendoza aron paminawon ang masigka habig.
Nitumaw sa imbestigasyon nga sad-an si Santos sa hitabo.
Niasoy si Jumao-as nga si Santos nagmaneho sa iyang motorsiklo ug niabot sa eskina sa karsada sa Pagsabungan ug Basak alas 2 sa hapon sa Huwebes. (Tan-awa ang CCTV footage sa Superbalita FB page sa hitabo).
Bisan kon gidili ang pagliko sa tuo kon go signal base sa traffic sign nga no right turn on red signal, niliko si Santos.
Tungod niini, gipara siya Mendoza ug giisyuhan og traffic citation ticket (TCT) tungod sa iyang kalapasan.
Matod ni Jumao-as nga nasuko si Santos, iyang gisundan si Mendoza ug gikalitan pagsukmag ang apapangig.
Mobawos unta si Mendoza, apan nauwang silang duha sa laing enforcer.
“Ang apapangig naigo. Di katarong og kaon,” paghulagway ni Jumao-as sa epekto sa pagsukmag ni Santos kang Mendoza.
Iya kining gipa leave og tulo ka adlaw with pay aron makapahuway.
Matod ni Jumao-as nga iyang ibalhin sa mobile team si Mendoza, inay anha lang sa karsada. (REV)
0 Comments