GIILA sa kapulisan nga big-time pusher nga bag-ong nakagawas sa bilanggoan ang nakuhaan og dul-an P1 milyon nga gidiling drugas sa buy-bust sa Sitio Abellana, Barangay Luz, Dakbayan sa Sugbo, alas 3:15 sa hapon sa Lunes, Agosto 30, 2021.
Si Ferdinand Nudalo Sedillo, 43, ulitawo ug nagpuyo sa nahisgutang lugar, nasikop isip high value individual (HVI) Level 2 sa rehiyon.
Si PLtCol. Randy Caballes, hepe sa City Intelligence Units (CIU) sa Cebu City Police Office (CCPO), maoy nangulo sa operasyon.
Si Sedillo nakuhaan og 120 gramos nga shabu nga mobalor sa P816,000 base sa Dangerous Drugs Board (DDB) value ug P2,000 cash nga gituhoang halin sa drugas.
Matod ni Caballes, si Sedillo nadakpan na nila niadtong Mayo 3, 2019 sa samang kaso ug nakagawas kini sa Cebu City Jail niadtong Abril 21, 2021.
Ilang gipaubos sa surveillance ug nasuta nga nagpadayon sa illegal ng kalihukan sa drugas sa Barangay Luz, Mabolo, Lahug ug ubang silingang barangay.
Makabaligya siya og 200 ngadto sa 300 gramos nga shabu matag semana.
Si Caballes nibutyag nga usa ka ginganlan og “Jerome Sosmena aka Master,” kanhi kauban nga naa sa City Jail, maoy tig-supply sa illegal drugs kang Sedillo.(GPL)
0 Comments