NAKUHAAN og moabot sa 50 gramos nga gidiling drugas nga gibanabana nga mobalor og P340,000 ang mag-live-in partners nga gitumbok nga high value individual (HVI) sa City Intelligence Unit CIU sa Lapu-Lapu City Police Office (LCPO) atol sa ilang buy-bust sa Sitio Takan, Barangay Ibo sa alas 10:40 sa gabii, Agusto 26.
Ang dinakpan mao si Carmelo Romblon Vergara, molupyo sa lungsod sa Dalaguete, apan nanimuyo sa dan Pacaña, Barangay Tisa, Dakbayan sa Sugbo ug ang live-in partner niining si Melissa Fajardo Abellana, molupyo sa dan Pacaña sa samang barangay.
Sumala nila ni Police Major Joey Bicoy, pangulo sa operasyon, ug Police Lieutenant Noah Añana, team leader, ang ang live-in partners ilang nahibaw-an nga nalambigit sa pagpayuhot og gidiling drugas human migawas ang mga pangalan niini gikan sa mga dinakpan sa nangagi nilang operasyon.
Gipaubos kini nila sa pagpaniid sulod sa usa ka semana ug giingong gikan gihapon sa bilanggoan ang ilang contact sa ma-dispose nga mga gidiling drugas.
Si Vergara adunay pending warrant of arrest sa Lungsod sa Dalaguete gumikan gihapon sa pagpayuhot og gidiling drugas.
Gi-serve ang iyang warrant diha na sa detention cell sa LCPO niadtong Agusto 26.(GCM)
0 Comments