NABALDA ang trabaho sa libuan ka mga kawani sa Cebu City Government human nakadawat og kasayoran ang command center nga dunay bomba sa Cebu City Hall sa alas 10:50 Biyernes sa buntag, Agosto 27, 2021.
Si Ramil Ayuman, pangulo sa Local Disaster Risk Reduction and Management Office (LDRRMO), niingon nipahibawo dayon siya sa mga opisyal sa City Hall pinangulohan ni City Administrator Floro Casas Jr., ug nakig-alayon sa kapulisan.
“Merong bomba kaming itinanim sa Cebu City Hall, kung gusto nyong mailigtas ang inyong mga empleyado gumawa na kayo nang mabilisang aksyon, ang bomba ay sasabug na,” sumala sa text gikan sa 0938-7413-756.
Gumikan niini, daling gipabakwit ni Casas ubos sa mando ni Mayor Edgardo Labella ang libuan ka kawani gikan sa City Hall paingon sa dakong wanang sa Plaza Sugbo ug MC Briones aron mabalhin sa mas luwas nga lugar ang kinabuhi sa mga kawani.
Ang mga pulis auban ang bomb sniffing dogs dali nga nisusi sa City Hall legislative ug executive buildings ug negatibo ang giingong bomba.
“I am thankful that the bomb threat turned out to be a false alarm. I thank Councilor Dave Tumulak, PMaj Edgar Labe, Mr Ramil Ayuman and all key personnel for calmly and thoroughly responding to the threat,” padayag ni Labella.
Si Konsehal Dave Tumulak nagkanayom nga sa iyang nahinumdoman, kini maoy ikatulo nga hitabo nga gibinuangan ang City Hall nga adunay bomba sa niadtong tuig 2013.
Ang mga kawani nga nahinabi sa Superbalita Cebu nagkanayon nga nakalimot sila pag-off sa computer, air-conditioner, nalimot pagdala sa ilang bag ug ubang importante nga gamit sanglit kalitkalit ang pahibawo.
Apan aduna say uban nga nakadala sa ilang mga bag, helmet sa motorsiklo ug adunay uban nagpost nga naapil nila og dala ang cake.
Ang mayor nanawagan ngadto sa CCPO pinangulohan ni Colonel Josefino Ligan aron masusi kon si kinsa ang nagbinuang sa ‘bomb threat.
“I now ask the PNP to please investigate the identity of the sender of the bomb threat and bring him to the bars of justice,” dugang ni Labella.
Gumikan niini, gisuspenso ang transaksyon sa City Hall ug gipapauli ang mga kawani lapas sa ala-una sa hapon ug nagbilin og skeletal force para pagtubag sa mga emerhensiya. (PAC)
0 Comments