Gitangtang sa Commission on Elections ang upat ka mga sakop sa Cebu City Council pinaagi sa pag-nullify sa ilang pagkapili sa piniliay sa 2019.
Bisan pa niini, magpabilin ang tanang mga sakop sa ika 15 nga Sangguniang Panlungsod sa Dakbayan sa Sugbo gawas kon ang hukom sa Comelec En Banc final na ug executory, matod sa Barug.
Ang Comelec ni-nullify sa proklamasyon sa pagkadaug nila ni Cebu City Councilors Eugenio Gabuya Jr., Renato Osmeña Jr., Raul Alcoseba, ug Phillip Zafra aron maghatag og dan sa recount sa botos pabor kang anhing manlalaban Marie Velle “Amay” Abella kinsa nidagan pagka konsehal sa south district sa dakbayan sa Mayo 2019 elections ubos sa Bando Osmeña-Pundok Kauswagan (BOPK).
Ang pagpahigayon sa special recount sa botos nahitabo human ang Comelec En Banc niluwat og writ of execution sa Comelec First Division ruling nga nagdeklarar kang Sherwin Luie Abella isip nuisance candidate sa 2019 elections.
MAGPABILIN
Si Konsehal Raymond Alvin Garcia, majority floor leader sa Council, niingon nga ang upat ka mga konsehal magpadayon sa ilang trabaho ug padayon nga motambong sa sessions sa Konseho.
Ang Konseho padayong mopahigayon og regular ug special sessions ug nidugang nga di kini makaapekto sa quorom.
Matod ni Garcia nga motahod ang Konseho sa hukom sa Comelec En Banc kon kini final and executory.
Hangtod di pa kini moabot, ang upat ka mga konsehal tipik gihapon sa official roll sa Konseho.
Si Zafra, kinsa hayan matangtang kon si Amay makakuha og mas daghang botos kay kaniya ug sa ubang tulo ka konsehal, niingon nga maghuwat siya sa hukom samtang ang iyang abogado mao nay naghupot niini.
Sa pagkakaron, si Zafra niingon nga magpadayon siya sa iyang trabaho isip konsehal.
Si Gabuya, sa iyang bahin, ni text sa Sunstar nga di niya igsapayan kon mous-us ang iyang ranking sa Konseho.
Si Garcia niingon nga di na kini mahitabo kay ang pag-apelar ug pag-ihap sa botos madugay.
Si Amay namatay sa Mayo 26, 2020 sa pancreatitis. Siya 37.
Kon siya modaug, ang Liberal Democratic Party (LDP) mo-nominate og mopuli kang Amay, matod ni Gabuya.
Ang i-nominate nagkinahanglan og pagtugot sa Presidente.
Sa eleksyon sa Mayo 2019, si Amay nakakuha og 110,131 botos samtang si Sherwin Luie dunay 20, 262 botos. Kon idugang ang iyang botos sa kang Amay, moabot kini og 130, 393 botos.
Si Zafra dunay 115,292 botos.
Niini, kon si Amay makakuha og dugang botos kay sa upat ka mga konsehal, mopadaghan kini sa mga konsehal sa BOPK gikan sa unom ngadto sa pito, wa pay labot kanila ni ex-officio members Association of the Barangay Councils (ABC) president ug Kasambagan Barangay Captain Franklyn Ong ug Sangguniang Kabataan (SK) Federation sa Cebu City president, Jessica Resch.
Ang Barug ug BOPK parties dunay tag siyam ka mga konsehal.
Apan sa pagdeklarar nila ni Zafra ug Hontiveros nga independent, hayan maapektuhan pa og maayo ang Barug.
Si Bise Mayor Michael Rama nidumili sa pagkomentaryo kay maghuwat pa siya sa hukom sa Comelec. (JJL)
4 ka Cebu City councilor gitangtang sa Comelec
Source: Sonstar
0 Comments