Hotshots nakauna batok sa painters

Gipangtuhik saMagnolia Ang Pambansang Manok Hotshots ang Rain or Shine Elasto Painters, 81-70, kagahapon, Septiyembre 26, 2021, sa pagsugod sa ilang best-of-three quarter-finals series sa Philippine Basketball Association (PBA) 2021 Philippine Cup sa Don Honorio Ventura State University Gym sa Bacolor, Pampanga.

Gipangulohan ni Paul Lee ang kadaugan pinaagi sa iyang 20 puntos, 14 niini iyang gimugna sa 4th quarter, samtang nidugang og 19 puntos ug 13 rebounds si Ian Sangalang.

“Pag di ka nagtrabaho di mo makukuha game na ito,” batbat ni Sangalang.

Nagkumboya og maayo ang tanang mga magduduwa sa Hotshots aron alkontrahon ang kabangis nga gipakita sa dekalidad nga rookie sa Elasto Painters nga si Santi Santillan sa 4th quarter.

Si Santillan, kinsa produkto sa University of the Visayas (UV) Green Lancers, nagpakatap og 17 puntos diin 13 niini iyang gimugna sa 4th quarter.

“We talked about how to outhustle, outwork our opponent,” batbat ni Magnolia coach Chito Victolero.

“In terms of talent, we’re not that deep. Pero chemistty and working hard number one para sa akin itong team na ito. Kita naman sa mga batang ito, ‘yung mga 50-50 balls, hustle.”

Gipasabot ni Victolero nga gipagawas gyud nila ang tanan nilang ikabuga gumikan kay nasayod sila kon unsa ka mahinungdanon nga makuha ang kadaugan sa Game 1 sa hamubo nga series sama niini.

“Very important iyung Game 1. Iyan magbibigay ng momentum,” matod ni Victolero.

“Kilala naman natin si Paul, eh. Anytime he can score 12, 15 points in any given stretch. Pag nag-struggle si Paul alam ko na makakabalik at makakabalik iyan dahil grabe kompiyansa ng bata.”

Nakatabang og dako sa kadaugan sa Hotshots mao sab ang ilang maayong depensa hilabi na sa 3rd quarter.

Ang depensa sa Hotshots maoy hinungdan nga nakamugna sila og 23-8 run sa 3rd quarter nga maoy nakahatag kanila og dakong labaw.

Puntos matag usa:

Magnolia (81) – Lee 20, Sangalang 19, Jalalon 10, Dela Rosa 10, Abueva 8, Barroca 8, Corpuz 4, Pascual 2.

Rain or Shine (70) – Santillan 17, Nambatac 16, Mocon 11, Belga 8, Borboran 5, Norwood 3, Caracut 3, Ponferada 3, Yap 2, Torres 2. (ESL)

Hotshots nakauna batok sa painters
Source: Sonstar