INAHAN gikulata sa iyang anak tungod kay wala mohatag sa P15 nga iyang gipangayo alas 7:45 sa gabii sa Martes sa Sitio Ginatilalonan, Brgy. Malhiao, Lungsod sa Badian, Sugbo.
Ang biktima giila nga si Jocelyn Palagtiosa Siclajon, 42, nagpuyo sa nahisgutang lugar.
Si Jocelyn naglisod na pagbuka sa iyang walang mata kay napikot, nihubag ang mga ngabil ug agtang human kulataha sa iyang anak nga si Joel Palagtiosa Siclajon, 20, ulitawo.
Si Police Staff Sgt. Jeffrey Badilles sa Badian Police Station nga nahinabi sa Superbalita Cebu nagkanayon nagsaulog sa iyang birthday si Joel.
Nahubog kini ug nagmaoy human nga wala hatagi og P15 sa iyang inahan aron idugang sa pagpagasolina sa iyang motorsiklo.
Gumikan sa iyang kalagot, matod ni Badilles, nga iyang gikomprontasi ang iyang Inahan.
Mipadayag ang suspek sa iyang kasagmuyo ngadto sa iyang Inahan nga samtang maayo kini sa iyang mga igsuon, kay mohatag dayon og kwarta kon mamarayeg.
Kon siya na ang mangayo, balibaran siya ug yawyawan pa.
“Siyempre, Sir, ang mama mabalaka kay birthday sa (suspek) magpagasolina sa motorsiklo, molakaw unya nakainom delikado,” dugang ni Badilles.
Si Joel nga giingong wala makasabot sa punto sa Inahan nga malikay siya sa disgrasya, nasuko, nanghagis.
kalit kining nag-wild ug gisukmag sa makadaghan ang iyang inahan.
Gumikan sa kaguliyang sa ilang pamilya, gialarma sa mga silingan ang kapulisan nga dali nga nakareponde.
Si Joel giingong nisukol pa sa mga pulis nga nirespondi una napusasan.
Gani ang mga residente ug mga pulis gihagit og sinukmagay.
Kasong physical injury ingon man disobedience in person of authority ang giandam nga ipasaka sa kapulisan batok kang Joel.
Wa mohatag sa P15, mama gikulata sa anak
Source: Sonstar
0 Comments