Pagbakuna sa mga bata sa Cebu City magsugod na karon sa SWU PHINMA

ANG Dakbayan sa Sugbo magsugod karong adlawa, Nobiyembre 8, sa pagbakuna sa mga menor de edad nga himsog o walay comorbidities adto sa designated site sa Aznar campus sa Southwestern University (SWU) PHINMA sa Sambag II.

Estrikto nga walay walk-in nga dawaton, kadto lang nagparehistro daan maoy atimanon.

Apan kinahanglan nga magpasabot nga maabtan og text message o advice gikan sa CebuCityVax sa dili pa moadto sa Aznar campus alang sa pagpabakuna.

Ang naka-schedule sa maong adlaw, ang mga ginikanan o guardian mokuyog sa bata, magdala sa ilang valid identification card (ID).

Kon guardian, magdala og written authorization gikan sa ginikanan sa bata. Kon naa sa abroad, kinahanglan mokuha og power of attorney alang sa designated guardian.

Ang mga miyembro sa Philippine Pediatric Society, Inc. sa Central Visayas ubos sa pagpangulo ni Dr. Alfredo Bongo, Jr., motabang sa paghatag og bakuna sa mga bata sa SWU Aznar site. (RRM, PR)

Pagbakuna sa mga bata sa Cebu City magsugod na karon sa SWU PHINMA
Source: Sonstar