DAGHANG mga kaso ang hayan atubangon sa usa ka pulis sa Tabogon Police Station kinsa gipasanginlan nga nangulata ug nanion sa usaa ka delivery driver ug duha niya ka mga helper nga pulos menor.
Gibalhog sa Medellin Police Station si Patrolman Viance Lord Rosello, 32, nadestino sa Police Community Relations (PCR) sa Tabogon Police Station, taga Brgy. Antipolo, Medellin.
Matud pa ni Police Major Welther Dinopol Grapa, hepe sa Medellin police, nga si Rosello gireklamo sa usa ka ahente/delivery van driver ug iyang duha ka mga katabang nga menor de edad mga alas 3:10 sa Martes sa hapon, Nobiyembre 23, 2021, sa sityo Lahug, Brgy. Antipolo sa nahisgutang lungsod.
Ang drayber giilang si Carlito Algadepe, 31, taga Brgy. Calape, lungsod sa Daanbantayan, amihanang Sugbo.
Ang iyang duha ka helper nga mga lalake pulos mga menor de edad hinungdan nga gipugngan ang ilang mga ngan.
Matod ni Grapa nga usa ka Alexander Velez ang nipahibawo kanila nga dunay usa ka police officer nga nanukmag ug nanion og armas sa tulo ka mga tawo.
Dali dayon nilang gitubag ang alarma pinaagi sa pagpadala sa usa ka team nga gipangulohan ni Police Lt. Gerry Antopina.
Apan sa ilang pag-abot, didto na ang mga pulis sa Daanbantayan nga unang nakaresponde.
Sa ilang hiniusang pagpahigayon sa imbestigasyon, si Rosello gipasanginlan nila ni Algadepe nga nanion kanila og armas ug nanukmag ug nanimaho og ilimnong makahubog.
Ilang gidala si Rosello sa Cebu Provincial Hospital sa Dakbayan sa Bogo alang sa pisikal nga eksaminasyon ug liquor test kay nanimaho pa kini og ilimnong makahubog.
Ilang gibalhog sa prisohan si Rosello human sa medical check up.
Si Grapa niingon nga base sa sulti ni Antopina kaniya, nangatarungan si Rosello nga nagpahigayon siya og anti drug operation ug nga ang tulo maoy iyang target.
Apan gipangutana siya kon nganong wa siya mo-coordinate sa Medellin police.
Sa lahi nga imbestigasyon ni Grapa, si Rosello niingon nga birthday sa iyang pag-umangkon hinungdan nga niadto siya sa dapit aron unta mopalit og isda, apan nasaghiran ang iyang motorsiklo nila ni Algadepe.
Matod ni Grapa nga dinhi nagkasungi na ang mga pamahayag ni Rosello.
Ning pagsuwat, naghuwat pa sila sa pagbalik sa mga complainant.
Kasong grave threats ug kalapasan sa Republic Act (RA) 7610 kun Special Protection of Children Against Abuse, Exploitation and Discrimination Act ang hayan atubangon ni Rosello.
Matod ni Grapa nga kon makalusot si Rosello sa mga kasong kriminal kon moatras ang mga reklamante, maglisod siya sa kasong administratiba.
Apan naa ra sa Tabogon Police Station kon pasakaan ba siya og kasong administratiba tungod sa iyang gibuhat.(GPL)
Pulis nga ‘hubog nanukmag, nanion’ og driver, 2 ka menor
Source: Sonstar
0 Comments