NALUMOS ang 3 anyos nga batang lalake sa baril ala 1:30 sa hapon sa Lunes, Agosto 23, 2021 sa Sito Badiang, Brgy. Calape, lungsod sa Daanbantayan, amihanang Sugbo.
Patay nang niabot sa tambalanan si Angelo Jade Rodrigo, nagpuyo sa lugar.
Si Police Señor Master Sgt. Keith Castro, sa Daanbantayan Police Station nga nahinabi sa Superbalita Cebu nagkanayon nga ang inahan sa bata dunay gipalit sa tindahan duol sa ilang balay.
Ang mama mibutyag nga nagduwa-duwa ang iyang anak sa sala sa iyang paggawas sa balay.
Sa iyang pagbalik, iya nang nakit-an nga nag-ubo sa baril sa kasilyas nga dunay tubig ang iyang anak.
Dali niyang giaswat ang bata ug gidala sa tambalanan apan nakabsan sa kinabuhi.
Ang inahan nibutyag nga wala siya magdahom nga mosulod sa pansayan ang bata kay nalingaw kini sa pagduwa sa sala.
HUBOG NALUMOS
Samtang usa hubog nalumos human misawom sa dagat alas 5 sa hapon Lunes sa Brgy. Bitoon, Lungsod sa Dumanjug.
Ang biktima giilang si Cristito Patong, 49, ulitawo, dead-on-arrival (DOA) sa ospital.
Si Police Staff Sgt. Merlo Dapan nagkanayon ang mga kauban ni Patong nibadlong kaniya nga mopauli na kay hubog.
Apan wala mopatuo, nisawom sa lawom nga bahin sa dagat.(GPL)
0 Comments