KAPULISAN sa siyudad ug Kagamhanan sa Dakbayan sa Sugbo miinspeksyon sa mga karenderia nga naa sa sulod sa sirado nga lugar lakip na ang mga pungko-pungko aron did-an nga makapa dine in tungod sa padayong nagsaka nga mga kaso sa coronavirus disease (Covid-19).
Sukad sa Lunes, Agosto 23, 2021, subsob ang inspeksyon sa kapulisan ug Cebu City Hall sa mga kan-anan sa dakbayan aron pahimangnoan nga gidili pa ang dine-in sa mga sirado nga lugar lakip na ang pungko-pungko, tuslob buwa ug namaligya og pagkaon pinaagi sa cart nga naa lang sa aseras.
Mamahimo nga maka dine-in ang mga karenderia nga naa nahimutang sa open area, apan 50 porsiyento lang ang gitugot aron matuman ang social distancing sa mga kustomer.
Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO), nga ang maong mga pagkaonan apil sa Covid spreader tungod kay magsikit naman ang mga mangaon.
Magpadayon kini hangtod sa katapusan sa Agosto diin kadtong mga tawo mga masakpan nga mangaon, lakip na ang tag-iya sa kan-anan, mahimong dakpon nunot sa kalapasan sa executive order sa Siyudad.
“Usa sad sa nakita sa EOC nga usa sad sa contributory kon asa ang source sa infection kon daghang tawo ang magtapok,” matod ni Parilla.
Gimandoan na ni Police Colonel Josefino Ligan ang tanang police stations nga makig-alayon sa mga barangay kapitan nga suroyon ang mga kan-anan sa ilang dapit.
Lakip sa gipahibawo ni Parilla nga gimandoan usab ang hepe sa Carbon police station ug Sawang Calero nga idili lang una ang dine-in sa mga tuslob buwa nga nahimutang sa mga barangay nga nahisakop sa ilang hurisdiksyon.
Nanawagan si Parilla sa publiko nga magtinabangay aron moubos pa ang mga kaso sa Covid sa siyudad aron dili isaka ngadto sa enhanced community quarantine (ECQ) ang tibuok dakbayan nga maoy labing taas nga quarantine classification.
Ang Siyudad ubos sa modified enhanced community quarantine (MECQ) hangtod sa Agusto 31 tungod sa padayong nagsakang mga kaso sa Covid-19.
0 Comments