GIPAHIBAWO ni Lapu-Lapu City Mayor Junard Chan nga dili ra kinahanglan magparehistro ang mga Oponganon nga ganahan maturokan sa bakuna batok sa Covid-19 sa kabarangayan nga suroyon sa vaccination team sa kagamhanan.
Kini gumikan kay wala may gitagana unyang target ang mga vaccinator sa higayon nga mosuroy na sila sa mga sitio ug mga subdivision sa dakbayan.
Hatagan gihapon og prayoridad ang mga senior citizens ug persons with disabilities (PWD) sa pagturok kon ugaling aduna.
Nadesisyonan kini sa Kagamhanan gumikan kay inanay na usab nga dili na ingon ka busy ang mga vaccinator sa mga vaccination site sa dakbayan.
Gipasabot ni Chan nga gituyo kini nila aron nga makab-ot ang herd immunity sa dakbayan sa dili pa matapos ang 2021.
Sa Agusto 25, unang bisitaon sa mga personnel sa City Health Office ang Collinwood subdivision sa Brgy Basak alang sa mga lumolupyo niini ug kasikbit usab nga mga lugar.
Si James Sayson, deputy officer sa Vaccination Operations Center sa dakbayan, una nang nibutyag nga sagad sa mga lumolupyo sa barangay sa ilang pagsugod oug bista niadtong miaging semana mibati gihapon og kabalaka sa sayop nga impormasyon sa bakuna.
“Wa na tong scheduling kay taga diha man sila pero didto sa site kinahanglan gihapon marehistro didto kay mao man toy bases nato sa atong QR code and also the numbering nila,” matod ni Chan. (GCM)
0 Comments