GIMANDOAN ang matag station commander sa Cebu City Police Office kansang barangay nga ubos sa ilang hurisdiksiyon nga adunay taas ang kaso sa Covid-19 nga pahugtan ang implementasyon sa Oplan Puyo.
Sa dihang namatikdan nga kadtong police station nga menos og mga dinakpan nga nakalapas sa health protocol adunay daghang kaso sa na-Covid.
Samtang kadtong police station nga daghan og dinakpan nga nakalapas sa health protocol adunay ubos ang kaso sa nataptan sa virus.
Base sa talaan sa CCPO nga sulod sa Agosto 3-21, moabot sa 4,722 ang nag positibo sa Covid nga nakapa-alarma sa kapulisan gumikan sa gidaghanon.
Tungod niini gihingusgan sa CCPO ang executive order nga giluwatan ni kanhi acting mayor Michael Rama ang Oplan Puyo sa istriktong ipatuman ang health protocol sa Top 10 barangay nga adunay labing daghang kaso sa Covid.
Kini naglangkob sa barangays Guadalupe, Tisa, Lahug, Talamban, Punta Princesa, Capitol Site, Camputhaw, Labangon, Mabolo ug Apas.
DAGHANG DAKOP
Moabot ngadto sa 5,583 ang nadakpan atol sa gipatuman nga Oplan Bulabog human girombo ang mga hilit nga sityo sa kabarangayan ug nag-una sa mga police station nga adunay daghang dinakpan mao ang Police Station 5 (Carbon) nga adunay 708 ang nasikop ug Police Station 6 (Sawang Calero) nga adunay 634.
Matod ni Police Lieutenant Colonel Wilbert Parilla, deputy city director for operation sa CCPO nga nabantayan ni Police Colonel Josefino Ligan nga kadtong mga police station nga daghan ang madakpan adunay ubos ang kaso sa Covid itandi sa police station nga gamay ra ang masikop nga nakalapas sa health protocol.
Tungod niini gihimong sanglitanan ni Ligan ang mga police station sa Carbon ug Sawang Calero nga bisan sa kadaghan sa mga sikit-sikit ang panimay ug daghang tawo mas ubos ang kaso sa Covid, apan taas ang ilang dakop sa mga malapason sa health protocol ug EO sa kagamhanan sa siyudad sa Sugbo.
Nagpasabot kini matod ni Parilla nga kung makita sa mga tawo nga adunay mga police sa barangay nga estriktong mipatuman sa health protocol magpanagana mogawas ang mga tawo tungod sa kahadlok nga dakpon ug pamultahon og P1,000.
Gimandoan ang tanang station commanders nga dili molugak sa ilang pag-roving 24 oras.
Ang mga barangay nga sakop sa Station 5 mao ang Ermita nga naa usab ang Carbon public Market, samtang ang Sawang Calero maoy labing daghan nga nag sikit-sikit ang mga panimay.
Dugang pasabot ni Parilla nga ang mga madakpan nga nakalapas sa curfew ug health protocol diretso kini og turn-over sa duha ka holding area nga nahimutang sa barangay Labangon sa south ug Cogon Ramos sa norte nga bahin sa siyudad sa Sugbo.
MULTA
Matod ni Parilla nga wala nay labot ang CCPO sa pagpamulta sa mga madakpan sanglit ang kabanay niini mao na man ang mobayad sa treasurer’s office sa Cebu City Hall ug mopakita lang kini sa resibo ngadto sa Prevention, Restoration, Order, Beautification and Enhancement (Probe) team alang sa pag- release sa dinakpan.
Gawas sa multa ipa-ubos usab sila sa usa ka oras nga lecture seminar labot sa pagtuman sa health protocol lakip na ang mamahimong sangputanan kon matakboyan sa Covid.
0 Comments