Gamay rang gipa-duty sa Lapu city hall

GIPAHIBAWO ni Lapu-Lapu City Mayor Junard Chan nga nag-obserbar ang kagamhanan sa skeletal work schedule sugod Agosto 25, 2021.

Pasabot niini, limitado lang ang mga kawani nga mo-report sa Lapu-Lapu City Hall samtang ang uban work from home usab.

Kini tungod sa hulga sa coronavirus disease 2019 (Covid-19) subay sa datus sa City Health Office nga aduna nay 5 ka mga kawani sa City Hall nga nagpositibo.

Matod ni Chan nga sa 15 ka mga kawani, duha niini mga department head, usa ang marshall, kinsa na-assign pagbantay sa may ganghaan sa City Hall ug usa asawa sa usa ka sakop sa Konseho sa dakbayan.

Sagol ang gipamati sa mga nagpositibo, sumala sa mayor, gumikan kay adunay mild lang ang gipamati apan anaa usay anaa sa tambalanan.

Aduna usay nabakunahan na ug aduna usay wala pa mabakunahi sa mga nagpositibo.

Gimandoan na ni Chan ang City Disaster Risk Reduction and Management Office CDRRMO sa pagpahigayon og disinfection sa mga buhatan sa city hall.

Subling giawhag sa mayor ang publiko nga padayong mosunod sa minimum health protocol aron kalikayan ang Covid-19 hilabi na ang Delta variant nga anaa na sa palibot.

Niadtong Agosto 24, laing unom ka mga kaso sa Delta variant ang natala sa dakbayan nga maoy nakapabalaka ni Chan./GCM