Mayor sa Alcoy nabalaka kay 10 nay patay

GIAWHAG sa kagamhanan sa Lungsod sa Alcoy ang mga konstituwente nga magpahiling dayon sa doktor kon makasinati og mga simtomas sa Covid-19.

Kini human dunay 10 na ka mga tawo nga kumpirmadong patay sa Covid-19 nga natala sud sa Hulyo hangtod Agutso 2021 sa lungsod.

Matod ni Michael Angelo Sestoso nga nahinabi sa SunStar Cebu nga “alarming” ang gidaghanon sa mga namatay tungod kay gamay ra ang ilang populasyon sa Alcoy.

“Para namo 12 total deaths naman mi ron, alarming na namo kay gamay man gud mi. Last year gud, duha ra man among patay,” matod ni Sestoso.

Sigon pa ni Sestoso nga kasagaran sa mga namatay nag-edad og 70-anyos pataas ug dunay gihambin nga sakit.

“Ang uban gi-refer, ang uban suspected lang, wala gani sila nipahibalo nga gihilantan na sila og dugay. Nya usa pa sila moadto nga wala nay mahimo na nuon ba. Naay uban mahadlok i-swab kay mahadlok i-isolate,” dugang ni Sestoso.

Dugang pa ni Sestoso nga nihangyo na sila sa simbahan nga tabangan pagkumbinsir ang mga taga lungsod nga modangop sa Rural Health Unit (RHU) kon makasinati og ubo ug hilanat aron daling matambalan ug di na magpaabot nga mograbe ang balatian.

“Nagpatabang pud mi sa among simbahan nga pahibalo nga kon naa moy pamation, tawon pahibalo mo sa RHU para ma-address namog sayo-sayo, nga naa pa ta’y mahimo. Dili kay naglisod na mog ginhawa unsa pay mahimo nato,” matod sa mayor.

Matod ni Sestoso nga nitugot ang Department of Education (DepEd) Cebu Province nga gamiton ang mga lawak-saringan sa mga tunghaan sa lungsod alang sa mga Covid-probable.

Mopadala usab siya og suwat aron tugtan nga himuong isolation facility ang pipila ka mga tunghaan alang sa mga kumpirmadong nataptan sa kagaw.

Matod ni Sestoso nga adunay 20-bed capacity ang ilang kasamtangang pasilidad apil na niini ang anaa sa mga barangay.

Si Sestoso usab nagkanayon nga iyang gilibkas ang granular lockdown sa 14 ka mga panimay sa miaging semana ug duha nalang ang nagpabilin.

Gisiguro niya nga ang maong mga balay gisusi sa RHU kon pasado ba kini isip home quarantine.

Samtang, gihangyo usab ni Sestoso ang publiko nga mosabot sa iyang kamanduan nga gidid-an ang mga dayo sa pagpangaligo sa kadagatan sa Alcoy.

Apan iyang gipasalig nga ablihan sa publiko ang kadagatan kon magpadayon pagkunhod ang kaso sa Covid-19.(MVE)