MGA krimen sa Siyudad sa Sugbo mitibugsok og 31 porsiento sukad gipakatap ang daghang mga pulis sa kabarangayan niadtong Agusto 3 human gipaubos sa modified enhanced community quarantine (MECQ) ang tibuok dakbayan.
Sa natala nga crime incident sa Operations Branch sa Cebu City Police Office (CCPO) 43 lang ka mga krimen ang nahitaho sa Dakbayan sa Sugbo sukad Agusto 3-24 sa gabii itandi sa 63 sa miaging buwan.
Kini naglangkob sa lima ka murder, upat ka physical injuries, 25 ka theft nga maoy labing ubos nga crime volume nga nahitabo sa labing dako nga siyudad sa Central Visayas itandi sa susamang period sa miaging buwan.
Matod ni Police Lieutenant Colonel Wilbert Parilla, deputy city director for operations sa CCPO, nga ang usa sa hinungdan nga miubos pag-ayo ang mga krimen tungod sa presensya sa daghang mga pulis, diin ang mga tawo dili na mamahimong makagawas kon molapas na ang alas 10 sa gabii.
Gawas nga daghang pulis sa kabarangayan, hugot usab nga gidili ang mga inom tungod kay gipatuman ang liquor ban nga tungod niini sayo na nga mangatulog ang mga tawo.
Dugang ni Parilla nga sa usa ka semana nga crime incidents sa dakbayan, nakatala lamang silag walo ka kaso, labing daghan niini mao ang physical injuries ug usa ka murder.
Human nga gihingusgan ang Oplan Puyo ug Oplan Bulabog nga maoy mopatuman sa executive order sa Kagamhanan sa Siyudad sa Sugbo, daghan na ang dili manggawas sa ilang panimalay. /
0 Comments