GIAPROBAHAN na sa Archdiocese of Cebu ang pagpatukod sa Cebu City Government og kapin 1,000 ka nitso sa upat ka mga sementeryo sa dakbayan sa Sugbo.
Kini ang gipahibawo ni Konsehal Dave Tumulak human sa dul-an duha ka mga semana nilang pagpaabot sa mga opisyal sa simbahan nga mosugot ubos sa liderato ni Archbishop Jose Palma.
“Si Rev.Father Decoroso Olmilla sa San Nicolas de Tolentino Parish, member siya sa board sa Archdiocese of Cebu, gihatagan na ta nila og go signal. They want us to proceed right away,” padayag ni Tumulak.
Atol sa regular session sa Konseho kagahapon, Agusto 25, 2021, giaprobahan na usab ang memorandum of agreement nga makapirma si Mayor Edgardo Labella sa City Government ug Palma sa Archdiocese of Cebu aron ma-pormal ang paghimo sa maong proyekto nga giduso nila ni Tumulak ug Konsehal Jerry Guardo.
Ang simbahan maoy mogahin og 140 square meters nga luna sa menteryo samtang ang City Government maoy mogasto sa construction samtang ang simbahan maoy mo-control ug modumala sa operasyon.
Una niini, si Palma maoy nihangop sa proposal sa City Government aron usab matabangan ang mga pamilya, kinsa naglisod pagpangita og kalubngan sa ilang mga minahal.sa kinabuhi nga nitaliwan.
Si Tumulak nagkanayon nga unang tukoran sa City Hall mao ang menteryo sa Barangay Luz.
Andam na ang luna ug kuwang nalang ang mga materyales ug manpower.
Laing menteryo nga tukoran og 290 ka mga nitso matag usa naglakip sa Barangay Calamba, Talamban ug Carreta gumikan usab niining padayon nga pagdagsa sa mga namatay sa Covid-19. (PAC)
0 Comments