WA mamahin sa kalas o bahin sa pusta sa duwa ang patay human giyatakyatakan ug gibunala’g kahoy.
Ang krimen nahitabo sa sa Sitio Guimpilacan South, Barangay Kantubaon, Lungsod sa Tabuelan niadtong Agosto 22, 2021 alas 4:15 sa hapon.
Si Roel Cañete Pekitpekit, 45, dunay kapuyo ug nagpuyo sa nahisgutang lugar, namatay sa tambalanan niadtong Agosto 23, 2021.
Si Matthew Ponce Layague, 30, security guard ug taga Sitio Santo Niño, Barangay Kanluhangon, Tabuelan, gipusasan human sa nahitabo.
Si Police Staff Sgt. John Mark Asendiente sa Tabuelan Police Station nga nahinabi sa Superbalita Cebu, nagkanayon nga si Pekitpekit hubog.
Si Layague nag-referee sa dayon-dayon o lumad nga volleyball.
Samtang naglingkod si Layague kalit nga nibutho sa iyang likod si Pekitpekit nga nag-bonnet. Nagdala’g sundang ug gitigbas si Layague sa liog apan kini nakalingi, nakasagang sa iyang kamot hinungdan sa pagkasamad.
Nidagan si Pekitpekit ug gigukod ni Layague nga samaran. Sa kahubog ni Pekitpekit, natumba. Giduslak ni Layague og kahoy si Pekitpekit ug giyatakyatakan ang ulo, wa pa matagbaw sa kalagot, gibunalan niya og kahoy ang ulo. (GPL)
0 Comments