Ang Department of Health (DOH) sa Sabado, Agusto 28, 2021, nikompirmar nga kapin sa 19,000 ka bag-ong mga kaso sa coronavirus disease 2019 (Covid-19) natala, usa ka bag-ong record nga labing taas sa Pilipinas taliwa sa pagpalapad sa diagnostic tests.
Sa iyang case bulletin sa Sabado, ang DOH nitala og 19, 441 ka bag-ong mga kaso, dugang 167 nga nangamatay ug 19, 191 ka recoveries.
Ang dugang nangamatay, nga naglakip sa 76 ka mga kaso nga pasiunang gitumbok nga mga recovery apan nasuta nga nangamatay diay, nidala sa kinatibuk-ang nangamatay sa Covid-19 ngadto sa 33,008, mga upat lang ka adlaw human kini nitadlas og 32,000 sa Agusto 24.
Ang partial usab nga nangamatay sa Agusto nitabok sa 5,000 sa Sabado. Base sa case bulletin sa DOH, ang Covid-19 mortalities gikan sa Agusto 1-28, niabot na og 5,119.
Hinuon, ang case fatality rate, base sa inadlaw nga pagpanakod, nisaka og maayo itandi sa nangamatay, nagpabilin sa 1.71 percent sa tibuok nasod.
Ang bag-ong infections, nga nilabaw sa niaging labing taas nga naa sa 18,332 sa Agusto 23, nihatod sa kinatibuk-ang gidaghanon sa mga kaso ngadto sa 1,935,700.
Ang reverse transcription polymerase chain reaction (RT-PCR) test nga gipahigayon sa tibuok nasod nisulbong ngadto sa labing taas nga 71,620 sa Agusto 26, nga dunay record high positivity rate nga 27.5 percent.
Nagpasabot nga sa duha sa pito nga gi-swab test, nagpositibo sa Sars-CoV-2, kagaw nga nagdala sa Covid-19. (MVI, HDT sa SunStar Philippines)
0 Comments