Ang Cebu City Government, Panaghiusa party ug Dumper Partylist nga nagtuboy kang presidential daughter ug Davao City Mayor Sara Duterte sa pagdagan pagka-presidente sa 2022 presidential elections maoy nagpasiugda sa pagpanghatag og bugas sa gibanabanang 5,000 ka mga taxi driver sa dakbayan ug lalawigan sa Sugbo.
Si Atty. Joey Daluz III, presidente sa Panaghiusa Party, nagkanayon nga 12 kilos nga bugas ang madawat sa matag driver, uban sa canned goods, noodles ug face masks nga magsilbing ayuda niining panahon sa pandemya.
Nadawat sa mga driver ang ayuda pinaagi sa drive thru aron pagsunod sa social distancing batok coronavirus disease (Covid)-19, kansang distribution gipahigayon sa North Reclamation Area luyo sa Robinsons Galleria nga nagsilbing headquarters ni Sara.
Si Daluz nibanabana nga molanat pa sa Lunes o Martes ang distribution sanglit 1,200 ka mga taxi drivers ang ilang gitarget nga matagaan matag adlaw sugod kagahapon, Agusto 28, 2021.
Ang gikinahanglan aron makakobra sa ayuda mao ang coupon nga gi-distribute sa ilang mga organisasyon ug ipakita lang kini kauban ang ilang driver’s license aron makuha ang ilang ayuda.
Si Daluz nagkanayon nga gisunod nila ang mga taxi driver sanglit nakahatag na sila ngadto sa mga PUJ driver.
Ilang plano sunod sab nga hatagan ang libuan ka mga habalhabal driver sa dakbayan sa Sugbo. (PAC)
0 Comments