UPAT sa walo ka mga barangay isolation center (BIC) sa Dakbayan sa Sugbo gipaubos sa disinfection.
Kini ang gipahibawo ni Konsehal Joel Garganera, deputy chief implementer sa Emergency Operations Center (EOC), sa Agosto 30, 2021, hinungdan sa pagdagsa sa daghang symptomatic Covid-19 patients sa ubang mga BIC.
Lakip sa mga BIC nga kasamtangang gilimpyohan mao ang eskwelahan sa Zapatera, Mabolo, Labangon ug San Nicolas diin temporaryo unang gisuspenso ang pagdawat og mga pasyente.
Gumikan niini, napuno na ang BIC sa City Central School, apan aduna pay bakante sa Guadalupe (26 beds), Don Sergio (60 beds), ug Mega stay in (39 beds).
Si Estanislao Kimhe Chan III, kinsa maoy nagdumala sa mga BIC, nagkanayon nga mahuman ang disinfection process karong semanaha ug mahimo sa usab silang makadawat og mga pasyente.
Sa kasamtangan, ang BIC adunay 642 ka mga beds nga magamit, 388 niini nabutangan na og pasyente.
Niadtong Agusto 29, adunay 32 ka mga bag-ong nagpositibo sa Covid-19 mga asymptomatic ngadto sa mild symptoms ang nasinati samtang 47 ka mga individual ang nangaayo ug nakagawas na kagahapon.
Si Garganera nanawagan sa mga pasyente nga na-isolate nga makig-coordinate ug dili dayon mo-post sa social media aron mahatagan og solution ang problema. (PAC)
0 Comments