Ang Department of Health (DOH) 7 nitala og kinatibuk-ang 596 ka dugang recoveries sa Biyernes, Septiyembre 3, 2021, nga nidala sa kinatibuk-ang gidaghanon sa recoveries sa Central Visayas ngadto sa 99,900 kun 84 porsyento sa kinatibuk-ang mga kaso sa rehiyon.
Matod sa DOH 7 nga mayoriya sa mga kaso kun 218 sa dugang gitaho nga recoveries gikan sa Cebu Province. Ang Probinsya mao usab ang dunay labing daghan karon og aktibong mga kaso sa rehiyon nga naa sa 4,668.
Ang Siyudad sa Sugbo usab nitala og dugang 214 ka recoveries samtang ang Dakbayan sa Lapu-Lapu dunay 100, Mandaue dunay 50 ug Negros Oriental dunay 14.
Ang aktibong mga kaso sa rehiyon nisaka sab ngadto sa 15, 401 human ang 965 sa 4,391 ka specimens nagpositibo sa Sars-CoV-2, kagaw sa conavirus disease 2019 (Covid-19).
Mayoriya sa bag-ong mga kaso gikan sa Cebu Province (359), gisundan sa Cebu City (178), Bohol (152), Lapu-Lapu City (89), Mandaue City (82), Negros Oriental (72) ug Siquijor (33).
Nitaho sab ang DOH sa dugang 33 nga nangamatay sa Biyernes. Kini nga mga ihap naglakip sa mga kaso nga nahitabo mga usa ka semana kapin na ang nakalabay.
Ang 33 nga dugang nangamatay sa Biyernes gikan sa Cebu Province (25), Cebu City (4), Mandaue City (2), Lapu-Lapu City (1), ug Negros Oriental (1).
Sa usa ka post sa Sugbo News, media nga gidumala sa Cebu Provincial Government, sa Sabado, Septiyembre 4, niingon nga ang gidaghanon sa aktibong mga kaso sa Lalawigan nius-us gikan sa 5,015 sa Agusto 21 ngadto 3,836 sa Agusto 31 nga naghimo sa pagsaka sa recovery rate ngadto sa 77.1 porsyento atol sa samang 10 ka adlaw nga gidugayon, base sa data nga gipagawas sa Integrated Provincial Health Office.
Ang Ipho maoy naglahi sa gidaghanon nga gitaho sa 44 ka local government units ug unom ka component cities gikan sa gitala sa DOH 7 aron pag-ila sa mga kaso sa Covid-19 sa mga residente ug pasyente nga nagbutang sa probinsya isip ilang home address.
Samtang sa 272 nga gigahin nga intensive care unit (ICU) beds sa rehiyon, ang 184 niini okupado na, samtang 427 sa 1,070 beds nga gitagana nga Covid-19 ward beds sa tanan infirmaries ug levels, 1, 2, ug 3 hospitals sa rehiyon, bakante pa.
Kinatibuk-ang 988 sa 1,704 ka isolation beds gigamit na sa Septiyembre 3. (WBS)
0 Comments