Nikabat ngadto sa 303 ka mga trabahante nabakunahan sa Mandaue City Vaccination Operations Center (VOC) sa opisyal nga paglusad sa “Tara Shots sa Gabii: Night vaccination” niadtong Biyernes, Septiyembre 3, 2021, sa Mandaue City Cultural and Sports Complex.
Niadtong Agusto 20, 2021, naghimo ang VOC og dry run aron sutaon kon daghan ba ang buot nga magpabakuna sa gabii human sa ilang working hours. Nakabakuna sila og 341 niadtong gabhiona.
Matod ni Dr. Ligaya Dargantes, operations head sa Mandaue VOC, nga maayo ra ang dagan sa paglusad sa night vaccination bisan kon wala makaabot sa 400 nga target.
Sigon niya nga sa paghimo og Facebook live sa Mandaue City Public Information Office (PIO), nakabantay sila nga aduna pay ubay ubay nga daghan og mga pangutana unsaon pagpabakuna sa night vaccination.
Tungod niini, nakaamgo si Dargantes nga ubay ubay pa sab ang wala nahibawo sa maong inisyatiba alang sa mga trabahante.
Bisan pa niini, sigon ni Dargantes nga aduna gyuy pagkunhod sa gidaghanon sa buot nga magpabakuna sa dakbayan.
Gani, sa regular nila nga schedule, dili na sila makaabot og 1,000 ang magpabakuma matag adlaw sa matag vaccination site kay anaa nalang sa 500 ngadto sa 700.
Matod niya nga nagpasabot sab kini nga ang uban nilangay usa sa pagpabakuna kay permanente kining ilang serbisyo.
Apan, gipasabot ni Dargantes nga ang ilang pag-abli sa vaccination sites mag-agad sab sa mga bakuna nga maabot ug sa pagkakaron, aduna pay sakto nga supply.
Gawas niini, matod ni Dargantes nga usa sa hagit nga ilang nasugatan sa paglusad sa night vaccination mao ang pagpakatap sa mga personnel.
Kini tungod kay ang mga personnel mga boluntaryo lang ug ang uban kanila gikan pa sa regular vaccination schedule.
Karon nga minus pa ang magpabakuna sa buntag, sigon ni Dargantes nga ila usab gitunga ang shift, apan kon modaghan na sab og balik ang magpabakuna, gilaraw niya nga magkaproblema sila niini tungod kay kuwang sila sa tawo.
Gani, nagpadayon pa sab ang ilang pag-hire og personnel alang sa night vaccination.
Gipasabot sab ni Dargantes nga sa pagkakaron, matag Biyernes una ang ilang night vaccination.
Giawhag sab ni Dargantes ang publiko nga mobisita sa ilang official Facebook page (Mandaue VOC) aron updated sa ilang mga kalihokan. (KFD)
0 Comments