Nitala man tuod og siyam ka patay sa unang tulo ka mga adlaw sa Septiyembre ang dakbayan sa Sugbo, apan sa nakalabay nga usaka semana kapin miarang-arang na ang mga kaso sa coronavirus disease 2019 (Covid-19).
Ang data sa Emergency Operations Center (EOC) nagpakita og dugang lima nga nangamatay nga natala sa Septiyembre 3, 2021.
Matod ni Cebu City Councilor Joel Garganera, deputy chief implementer sa EOC, nga ang siyam nga nangamatay alang lang sa buwan sa Septiyembre
Ang EOC data nagpakita nga ang nangamatay tungod sa Covid-19, naglakip na sa Covid-19 probable deaths, niabot na og 1,255 sa Septiyembre 3.
Ang fatality rate karon sa siyudad naa sa 3.27 porsyento. Sa Agusto, ang EOC nitala og 280 nga patay.
Gitataw ni Garganera nga bisan tuod kon siyam ang patay nga natala sa unang tulo ka mga adlaw, iyang giklaro ang pag-arang-arang sa positivity rate sa siyudad.
Sa Septiyembre 3, ang EOC nitala og daily positivity rate nga 15.27 porsyento sa 1,192 ka mga tawo nga gi-test.
Matod ni Garganera nga ika 11 na kini nga adlaw diin ang positivity rate sa siyudad ubos sa 20 porsyento.
Ang total positivity rate sa siyudad naa lang sa 9.92 porsyento sa 387,071 nga gi-test.
Duna usay nabantayan nga pag-arang-arang sa mga tambalanan sa siyudad.
Matod niya nga sa Septiyembre 1, ang mga ospital sa siyudad dunay occupancy rate nga 70.3 porsyento kun 702 ka beds ang giukopar, apan sa Septiyembre 3, ang occupancy rate sa 15 ka mga ospital nikanaug ngadto sa 65 porsyento kun 632 ka beds ang okupado.
Gitagan-an og 973 ka katre ang mga pasyente sa Covid-19 sa 15 ka mga tambalanan.
Sa Septiyembre 3, ang kinatibuk-ang mga kaso sa Covid-19 sa siyudad niabot og 38,403 diin dunay 34,888 ka recoveries ug aktibong mga kaso nga 2,260.
Bisan pa niini, giawhag ni Garganera ang publiko sa di pagkompyansa.
“Just the same, Covid is still very much around so at any time, if we tend to be complacent, it will spike,” matod ni Garganera. (JJL)
0 Comments