DUL-AN sa 8,000 ka mga tawo nga nakalapas sa curfew ug wa mag-mask nadakpan sa mga otoridad sa dakbayan sa Sugbo sa unang 29 ka adlaw sa Ag0sto.
Ang mao nga gidaghanon mga 50 porsyento itandi sa kinatibuk-ang gidaghanon nga nasikop sa unang pito ka buwan ning tuiga.
Kini ang gipahibawo ni Raquel Bohol-Arce, pangulo sa Prevention Restoration Order Beautification Enhancement (Probe) niining panahon sa modified enhanced community quarantine (MECQ).
Ang Cebu City Covid Action Team (CCCAT) nakadakop og 2,651 ka violators samtang 5,133 ka mga individual ang nadakpan usab sa mga personnel sa Cebu City Police Office (CCPO) pinangulohan ni Colonel Josefino Ligan inabagan sa mga barangay tanod sa tibuok dakbayan.
Sa maong gidaghanon, 3,673 kanila nagagikan sa south district nga adunay 34 ka mga barangay samtang 4,201 ang gikan sa north district nga gilangkuban sa 46 ka barangay.
Si Arce nagkanakayon nga sagad sa kalapasan mao ang wala pagsul-ob sa facemask ug kalapasan sa curfew sa dakbayan, nga ang pagpatuman gipahugtan sa otoridad gumikan usab sa nagkadaghan nga mga kaso sa Covid-19.
Ang mga nakalapas sa curfew ug health protocol sa unang pito ka buwan anaa lang sa 14,884 samtang saa Agusto niabot og 7,784.
Sa kinatibuk-an, niabot na og 22,668 ka mga tawo ang na-apprehend sa CCCAT ug CCPO dinhi sa dakbayan sa unang walo ka buwan.
Kadtong adunay ika-afford nibayad og P500 samtang ang wala, nipaubos sa lima ka oras nga community service.
Si Arce nanawagan sa publiko sa kanunay nga pagsunod sa minimum health protocol labi na ang pagsul-ob sa facemask sa tanang higayon kon mogawas sa ilang balay ug kon moatubang og mga tawo.
Kinahanglan usab nga sundon ang curfew nga ipatuman sugod alas 9 matag gabii niining panahon sa MECQ aron dili madakpan sa mga otoridad sanglit ang ilang gibuhat mao ang pagpatabang sa katawhan nga malikay sa pagtakboy sa virus.
0 Comments