GIAWHAG pagbalik ni Mandaue City Mayor Jonas Cortes ang mga drayber sa pampublikong mga sakyanan nga magpabakuna human nga lima lang ang ningtunga sa paglusad sa “Bakuna, Bai,” usa ka drive-by vaccination sa Siyudad nga gilusad niadtong Agusto 29, 2021 sa Pajara Park, Dakbayan sa Mandaue.
Matod ni Cortes nga adunay pagkuwang sa pagpahibawo sa mga drayber sanglit gamay lang ang nagpabakuna.
Sa paglunsad sa “Bakuna Bai” dungan sab sa skedyul sa mobile vaccination clinic sa Barangay Umapad diin kasagarang nitunga mga residente sa Umapad diin adunay 218 nga nabakunahan.
Sigon ni Cortes nga dili sila mohunong sa pagmugna og mga istratehiya tungod dili kini epektibo sa unang adlaw.
Susihon una nila ang hinungdan sa gamay nga rollout sa pagbakuna ug pangitaan nila og solusyon aron mosaka na sa sunod nga higayon nga mopatuman sila niini, sigon ni Cortes.
Sa laing pakighinabi, niingon si Greg Perez, chairman sa Pinagkaisang Samahan ng mga Tsuper sa Operators Nationwide (Piston) Cebu, nga wala sila nahibawo nga adunay gihimong drive-by vaccination ang Dakbayan alang sa mga PUV drivers.
Kon nakahibawo pa sila, matod ni Perez nga ang mga miyembro sa Piston mopahimus niini.
Sa pagkakaron, matod ni Perez nga ang uban nilang mga myembro naninguha na og adto sa mga vaccination sites aron magpabakuna labi na nga risgo sila sa pagtakod tungod sa ilang linya sa trabaho.
Sa 30 ka mga miyembro sa Piston nga gitugotan nga mubyahe, ang 20 niini nakapabakuna na sa duha ka doses, samtang ang nahabilin nga 10 naghulat pa sa ilang iskedyul gikan sa barangay, sigon ni Perez. (KFD)
0 Comments