Ang tri-cities sa Cebu, Mandaue ug Lapu-Lapu magpabiling ubos sa modified enhanced community quarantine (MECQ) gikan sa Septiyembre 1 ngadto sa 7, 2021, matod ni Presidential Spokesperson Harry Roque sa iyang Facebook page sa Sabado, Agusto 28.
Si Roque niingon nga ang Inter-Agency Task Force (IATF) nipabilin usab sa general community quarantine (GCQ) with heightened restrictions status sa Lalawigan sa Sugbo ug Negros Oriental sa Central Visayas.
Ang tulo ka mga siyudad ubos na sa MECQ sukad niadtong Agusto tungod sa pagsulbong sa Covid-19 cases.
Sa Agusto 11,ang Cebu Provincial Government nipailawom sa mga lungsod sa Consolacion, Liloan, Cordova, Minglanilla, Sibonga, Samboan, Argao ug Oslob ingon man mga siyudad sa Talisay, Naga ug Carcar ubos sa MECQ.
Ang ubang mga dapit sa Cebu Province ubos sa GCQ with heightened restrictions sukad sa Agusto 1.
AGWANTAHA
Mga lumolupyo sa Cebu City moagwanta lang una sa quarantine status og dugang usa ka semana.
Matod ni Cebu City Councilor Joel Garganera, deputy chief implementer sa Emergency Operations Center (EOC), ang EOC ug City Government mogamit sa extension period sa pagpaubos sa mga kaso sa Covid-19 sa siyudad.
Matod ni Garganera nga ang mga kaso sa Covid-19 sa siyudad “are slowly going down,” apan naa lang gihapon sa three-digit matag adlaw.
“Yes, our cases are slowly going down, but still it’s three digits, punga gihapon,” sulti ni Garganera sa media.
Di pa usab siya mohangyo alang sa mas ubos nga quarantine classification, kay ang bag-ong variants sa Covid-19, labina ang Delta variant, di angay nga ibaliwala.
“Deceitful kaayo ni siya nga kontra. Molugak ta og kalit, basin mosaka na hinuon,” matod ni Garganera.
Base sa EOC data sa Agusto 27, ang kinatibuk-ang mga kaso sa Covid-19 sa siyudad niabot og 37,313 nga dunay 32,719 recoveries ug 1,210 ang nangamatay.
Nagpabiling aktibong mga kaso sa siyudad sa Agusto 27 naa sa 3,383.
WAY KOMPYANSA
Bisan kon naghinayhinay na og ubos ang mga kaso sa Covid-19 sa dakbayan sa Mandaue, mipahimangno si Mayor Jonas Cortes nga dili gihapon mokompiyansa.
Niingon si Cortes nga dili pa angay mokompiyansa tungod kay usa lang ka sipyat mamahimo nang makapalisod sa sitwasyon sa dakbayan.
Tungod niini, matod ni Cortes nga nangandam na sab sila og mga estratehiya alang niini.
Miingon si Cortes nga giandam na nila ang 70-bed capacity nga step-down facility nga magsilbi nga extension sa Mandaue City Hospital aron ang mga katre nga anaa sa ospital mahatag ngadto sa mas nanginahanglan og hingpit nga atensyon sa doctor.
Gisusi na ni Cortes ang maong pasilidad niadtong Agusto 27, 2021.
Dugang ni Cortes nga aron sab nga mapaspasan ang pagpamakuna sa ilang mga konstituwente naghimo sab sila og mga estratehiya,
Usa niini ang paglusad sa ilang drive thru vaccination “Bakuna,Bai” karong Agusto 29, 2021 alang sa mga driver sa pampublikong transportasyon nga residente sa dakbayan sa Mandaue.
Magsugod kini sa alas 8 sa buntag hangtod alas 4 sa hapon sa Pajara Park, Barangay Umapad, dakbayan sa Mandaue.
Kinahanglan pa magparehistro ang mga drayber ngadto sa link nga gihatag sa Facebook page sa Mandaue VOC. (JJL, KFD)
0 Comments