PATAY ang usa ka online seller human siya pusila sa wala mailhing mamumuno sa Purok Colo, Barangay Canjulao, Dakbayan sa Lapu-Lapu niadtong Huwebes, alas 9:20, Agosto 26, 2021.
Ang biktima giila nga si Romeo Bacalso Macaraya, 39, molupyo sa Barangay Kalawisan, Lapu-Lapu.
Base sa imbestigasyon sa Police Station 3 sa Lapu-Lapu City Police Office (LCPO) si Macaraya minaog sa iyang gimanehong motorsiklo daplin sa dalan aron mopalit unta og pan.
Apan ang mamumuno nga nagmotorsiklo usab nikanaug ug gipusil si Macaraya.
Human mapusili nisuway og dagan si Macaraya sa interior portion sa lugar ug nitago sa usa ka panimalay diin siya nahagba pag-usab.
Ang mamumuno giingong dali nga nibalik og sakay sa iyang motorsiklo ug nisibat.
Ang nirespondeng mga pulis nagkanayon nga si Macaraya patay na busa nanawag na lang sila sa Scene of the Crime Operatives (Soco).
Nakuha sa crime scene ang usa ka basiyo sa gituohang kalibre .45 nga armas.
Matod ni Police Chief Master Sergeant Mer Acebron sa Police Station 3 sa LCPO nga padayon pa nilang gisusi ang backgroundni Macaraya aron makakuha sila og motibo sa krimen.
Aduna pa usab silay gikombinsir nga saksi sa pagpamusil nga motabang sa imbestigasyon sa kapulisan aron mailhan ang mamumuno. (GCM)
0 Comments