Mokabat sa 22 ka lumolupyo sa Sitio Zone 2, Barangay Biasong, Talisay City nawad-an og balay nga kapuy-an sa sunog sa Sabado sa buntag, Septiyembre 11, 2021.
Duha ka mga balay ang naugdaw samtang duha ang nakaangkon og kadaut.
Base sa report sa Talisay City Fire Station, ang sunog nagsugod mga alas 10:35 sa buntag sa duha ka andanang balay sa usa ka Maria Victoria Panugalinog.
Mga bombero nangabot mga alas 10:41 ug giisa ang sunog sa seond alarm.
Nakontrolar ang kayo mga alas 11 sa buntag ug hingpit nga napawong mga 10 minutos ang nakalabay.
Ang danyos sa sunog mokabat sa P210,000.
Matod ni Fire Officer 1 Jayson Balabag, imbestigador, nga nisulti si Panugalinog nga ang kayo nagsugod sa ikaduhang andana sa iyang balay.
Napasagdan nga ceiling fan ang gituohan ni Panugalinog nga hinungdan.
Way naangol atol sa pag-ulbo sa kayo.
Si Talisay City Mayor Gerald Anthony “Samsam” Gullas gimandoan niya sa pag-abag sa mga nasunogan ang City Social Welfare Office (CSWO).
“For the meantime, our CSWO personnel will be providing free hot meals for our fire victims starting tonight. We also provided sleeping kits, hygiene kits and utensils that they can use while they are staying at the temporary evacuation center,” matod ni Gullas.
Iya usab nga gipaseguro nga masunod ang mga health protocol sa kasamtangang gipuy-an sa mga nasunogan.
Kinsa kadtong ganahan modonar, gidasig sila sa mayor sa paghimo niini. (JKV, REV)
22 ka tawo sa Talisay nasunogan og balay
Source: Sonstar
0 Comments