Kon taga Consolacion ka nga trabahante ug di makalugar sa schedule nga adlawan sa bakuna batok sa Covid-19, niay schedule nga haum kaayo nimo.
Sugod karong gabii sa Martes, Septiyembre 14, 2021, ang lokal nga kagamhanan sa lungsod sa Consolacion mamakuna na.
Si Consolacion Mayor Joannes Alegado nipahibawo nga ang ilang “Bakuna Nights” ipahigayon matag Martes ug Huwebes sa gabii, gikan sa alas 7 hangtod sa alas 10 sa gabii.
Si Alegado nipasabot nga kini gituyo aron sigurong makapabakuna ang mga trabahante nga dili makabiya sa oras sa ilang trabaho ug matabangan usab sa lungsod nga maproteksyonan ang maong sektor batok sa Covid 19.
Matod sa mayor nga makaduha lang kini matag semana kay duna man say tibuok adlaw nga pagpamakuna matag Sabado.
Isip pagdasig sa mga lungsoranon nga mabakunahan, mihimo usab og online raffle papremyo promo sa lungsod ang kagamhanan.
Sa kasamtangan nga lista, miabot na ngadto sa 80 ka mga indibidwal ang nakadaug og tag-25 kilos nga bugas ug 10 usab ang nakadaug og tag P500 nga gift check.
Gawas sa kwarta, may mga papremyo usab nga appliances sama sa refrigerator ug uban pa ang kagamhanan.
Subay niini, giawhag ni Alegado ang mga konstituente nga magpabakuna na aron makab-ot ang target niini nga herd immunity.
Sa talaan sa Municipal Health Office, moabot na ngadto sa 68,046 ang nabakunahan diin 39,083 ang nakadawat sa first dose ug 28,963 ang naturokan alang sa second dose kun fully vaccinated. (ANV)
‘Bakuna Nights’ ilusad sa Consolacion sa Martes sa gabii
Source: Sonstar
0 Comments