Nakamugna og grabeng kahadlok sa mga pasahero sa barko ang kalit nga pag-aso sa makina alas 9:00 sa Sabado sa buntag, Oktubre 2, 2021, sa kadagatan sa Sitio Mangudlong, Brgy. Himinsulan, San Francisco, mga isla sa Camotes.

Ang Mica Mari Uno, gipanag-iya sa Jomalia Shipping Corporation, maoy niaso samtang nagbiyahe padung sa Dakbayan sa Danao, amihanang Sugbo.

Hinuon luwas nga nakadunggo balik sa Camotes ang barko uban sa mga tripolante ug 95 ka mga pasahero.

Si Police Senior Master Sgt. Fil Florentino sa San Francisco Police Station nga nahinabi sa Superbalita Cebu nagkanayon nga ang Mica Mari Uno naglawig gikan sa Consuelo Wharf sa Barangay Consuelo, San Francisco alas 8:30 sa buntag padulong sa dakbayan sa Danao.

Matod pa ni Florentino nga mga 30 minutos human nakanabigar ang barko, kalit nga miulbo ang baga nga aso gikan sa makina niini.

Gumikan niini, daling gipawong sa mga tripolante ang makina aron dili masunog.

Wa pa masayri kon unsay hinungdan sa pag aso.

Nakamugna kini og kabalaka sa mga pasahero nga nagtuo nga nasunog ang makina.

Ang unang impormasyon gikan sa 911 Malacañang nga dunay barko nga miaso o nasunog.

Ang headquarters sa Cebu Police Provincial Office (CPPO) milabay dayon sa impormasyon ngadto sa kapulisan ingon man sa Philippine Coast Guard.

Nasuta nga mga alas 10:30 unta sa buntag maabot sa Danao City ang barko.

Apan wala na madayon, giguroy kini sa kauban nga barko nga Mica Mari 3 paingon balik sa San Francisco.

Nakadunggo ang barko mga alas 12:21 uban sa 15 ka mga tripolante ug 95 ka mga pasahero ug 10 ka rolling cargo.

Matod ni ship captain Cayaetano Artiaga nga samtang sila naglawig, kalit nga niaso ang makina.

Dali kini nilang napawong aron di masunog samtang napakalma nila ang mga pasahero nga nangahadlok.

Dunay mga pasahero nga wa na molahos sa biyahe samtang dunay nanakay sa alas 2:30 nga biyahe.

Sa pagsuwat ning taho, wa pay pamahayag nga giluwatan ang mga tagdumala sa Jomalia.

Niadtong Marso 2020, ang operation sa Mica Mari 3 gisuspenso sa Maritime Industry Authority (Marina) 7 human mapalyar ang makina niadtong Marso 2, 2020 samtang naglawig gikan sa mga isla sa Camotes.

Wa hinuoy naunsa atol sa insidente.

Ang Marina nakahukom sa pagsusi sa tanang mga barko sa Jomalia kay di kadto unang higayon nga nahitabo. (GPL)



Barko gikan sa Camotes padung sa Danao mi aso; mga pasahero luwas nga nakadunggo sa pantalan
Source: Sonstar