Ang Metropolitan Cebu Water District (MCWD) ni-award sa P218.8 milyones nga kontrata ngadto sa duha ka contractor para maoy magkumpleto pag-deliver sa 20,000 cubic meters nga suplay sa tubig matag adlaw gikan sa Barangay Lusaran, bukirang dapit sa Cebu City.

Ang CG Integra Corporation /M.E. Sicat Construction Inc. maoy motukod sa duha ka tag P103.5 milyunes modular tanks nga makapundo og tag 3,000 cubic meters nga tubig.

Laing kontrata balor og P115.3 milyones gi-award sa MCWD ngadto sa JFAP Construction /Optimus Engineering and Construction para maoy mo-istalar sa transmission line gikan sa reservoirs sa tubig sa Barangay Busay paingon sa Barangay Lahug, Apas, Camputhaw, Kasambagan ug ubang barangays alang sa 20,000 ka mga balay.

Ang mga dapit sa Apas, Lahug ug Busay nga nahimutang sa bukid dugay nang nag-antos sa kakuwang sa tubig kay di makaabot ang pressure tungod sa kataas sa elevation.

Ang JE Hydro and Bio-Energy Corporation maoy kaabag sa MCWD ilawom sa joint venture agreement (JVA) sa pagdevelop sa impounding sa tubig nga maoy ibomba paingon sa reservoir sa Barangay Busay.

Si Atty. Jose Daluz III, chairman sa Board of Directors sa MCWD, nagkanayon nga sa Oktubre 2022 makumpleto na ang pag-deliver sa tubig ngadto sa mga residente sa nahisgutang mga barangay.

Matod pa ni Engr. Michael Allan Sicat nga ilang paspasan og trabaho aron dili sila moabot sa 300 ka adlaw nga maoy nalatid sa kontrata.

“ What we do now is design the tank and then after that is the execution. So hopefully we can do it very fast. As we committed earlier, the people of Cebu can have their water as early as next year,”matod ni Sicat.

Sa iyang bahin, si Daluz nipadayag nga makabaton na og tubig ang libuan ka mga pamilya sa presyo nga maoy gibayran karon sa mga konsumidor sa MCWD.



2 ka contractor motrabaho sa tubig sa MCWD gikan sa Lusaran
Source: Sonstar