Niabot na og 195 ka mga tawo ang ningpirma sa manifesto sa mga grupo nga nitawag sa ilang kahugpongan og Alyansa sa mga Sugbuanon aron mabatokan ang ‘privatization’ sa Carbon Market.
Ang mga sakop sa Carbon Alliance nipahigayon og panagtapok nga gitambongan sa lainlaing organisasyon, diin ilang bisita si Francisco “Bimbo” Fernandez sa Pagtambayayong Foundation, kandidato pagka-bise mayor sa Cebu City sa 2022 elections.
Si Fernandez nagkanayon nga dili na angay butangan og mall ang Carbon ug angay paminawon sa Cebu City Government ang panawagan sa mga tawo.
“Nganong dili man ta nila paminawon? Di ba ang demokrasya unta ang lungsod kita maoy hari? Nganong sila may mag hari-hari?,” paghulagway ni Fernandez.
Si Fernandez nagpasalamat sa mga tawo nga ningtambong sanglit iyang gihulagway nga sila maoy nibarog ug nagpasiugda aron usab ang uban mopalanog sa ilang mga tingog.
Lakip sa nitambong sa panagtapok mao silang Wine Miro ug Joy Orlanes sa Carbonhanong Alyansa, Orlando Carvajal sa FORGE, Ramon Sevilla sa Paglaum sa Sugbo, Erwin Gok-ong Sr. ug Clarisa Otadoy sa Cemvedco ug ubang mga organisasyon.
Sila nanawagan sa simple, limpyo, hapsay, luwas ug barato nga palaliton sa Carbon nga buboan og pundo sa Cebu City uban sa pagtabang sa mga kooperatiba ug dili ang pribadong kompaniya sanglit gusto nila nga magpabilin nga ang gobyerno maoy magdumala. / PAC
Ang ilang gipasabot mao ang joint venture (JV) sa Cebu City Government ug Megawide Construction Inc. nga maoy mo-develop sa Carbon.
Kon mahuman ang proyekto, gikatakdang mo-income ang Siyudad og kapin o kulang P80 milyones matag tuig gikan sa annual guarantee fee , real property ug business taxes.
Sa pag-develop sa Carbon, base sa nasabotan nilang Mayor Edgardo Labella ug Louie Ferrer sa Megawide nga walay bisan usa ka vendor nga mawagtangan sa ilang panginabuhian.
Ang JVA molanat og 50 ka tuig.
Manifesto nga nagbabag sa modernisasyon sa Carbon giduso
Source: Sonstar
0 Comments