Di lang diay sa Bohol ug pipila ka mga dapit ang naigo sa Repa Paluwagan kay duna sab diay mga nangabiktima niini dinhi sa Sugbo.
Ang Securities and Exhange Commission (SEC) nihulagway sa Repa nga usa ka matang sa Ponzi scheme nga sa kadugayan mokalupso ug di na makadawat sa kuwarta ang naa sa labing ilawom. Ang mga nagpaluyo ani nga matang sa pangilad nagsaad og dagkong ginansya sa puhonan sulod lang sa duha ka mga semana.
Bisan sa kadaghan na sa nangaging Ponzi scheme, labing uwahi ug dako nga mao ang Kapa kun Kabus Padatuon, daghan gihapon ang nailad. Daghang mga biktima nga nangahugno kay wa na mahiuli ang ilang puhonan, diin ang uban niabot og milyunes.
Duna ganiy mga tawo nga ningsugal sa ilang retirement nga di matugkad ang kaguol.
Tinuod bang dunay mga investment nga modoble ang tubo sulod lang sa mubo kaayong panahon? Wala gyud bisan usa. Kon mosulod ka man gani nianang matanga sa investment, sama ra og imong gisugal ang imong kwarta.
Apan tungod lagi kay ang tawo gusto nga dali maadunahan, matintal dayon kon dunay mga tanyag nga “quick rich scheme.” Apan sa pagkatinuod lagi, way dali nga mamilyonaryo, gawas kon ikaw nakadaug sa lotto.
Sama sa tanom, ang usa ka negusyo nanginahanglan og igo, taas nga panahon sa pagtubo. Molanat pa kini og pipila ka mga tuig una matagamtaman ang maanindot nga mga bunga.
Busa kon dunay mga tanyag nga investment nga dali rang motubo, ayaw pagpailad kay lagi, way investment nga dali nga motubo o modoble ang imong kwarta sa usa ka pamilok.
Kon makasugat og ingon niana nga tanyag, mas maayong i-report ngadto sa SEC ug uban pang mga ahensya sa kagamhanan. Susiha usab kon duna ba silay pagtugot sa SEC nga manguhag investment.
Timan-i kanunay nga way kwarta nga modoble sa mubo nga panahon. Kon dunay motanyag, pangilad kana.
Editoryal: Pangilad kaayo na
Source: Sonstar
0 Comments