Si Cebu Governor Gwendolyn Garcia mipaluag sa paggamit sa face shield pinaagi sa pagluwat og executive order.
Sa mga lugar nga wa kaayoy tawo ug maayo ang paglusot sa hangin, mahimo nang di mogamit og face shield ang mga tawo.
Gikinahanglan lang kini kon naa sa 3cs kun closed nga dapit, crowded ang dapit ug closed-contact kun dunay mga kaestorya nga dug-ol ra.
Kon wa nalakip niini, mahimo nga dili na mag sul-ob og faceshield.
Mao kini ang unod sa bag-ong giluwatan nga Executive Order (EO) 43 ni Cebu Governor Gwendolyn Garcia sa Nobiyembre 5, 2021.
Sa Nobiyembre 4, unang mipadayag si Garcia nga uyon siya sa sugyot nga pagtangtang na sa pag gamit og face shield.
Niadtong Septiyembre 22, si Presidente Rodrigo Duterte nimando sa di na pagsul-ob og face shield kon naa sa gawas, anha lang sa mga dapit nga naa ang 3Cs.
Sa uwahing kalamboan, suportado sa Department of the Interior and Local Government (DILG) ang sugyot sa mga lokal nga kagamhanan nga limitatan ang pag sul-ob og face shield sa sulod lang sa mga hospital.
NEGUSYANTE MAGBUOT
Sa Dakbayan sa Sugbo, gitugyan ni Acting Mayor Michael Rama ngadto sa Cebu Chamber of Commerce and Industry (CCCI) ang desisyon kon ipadayon ba o dili ang paggamit sa face shield sulod mga business establishment.
Kini samtang wala pa makaisyu og bag-ong direktiba si Rama may labot sa face shield.
Mandatory kini sukad niabot ang pandemya apan karon giwala na sa Davao City.
“ I have been telling before that iIwas very happy the President (Duterte) naghatag og pronouncement kay preposterous kaayo nang face shield. Inig sulod nimo sa mga establishment, wala man na gamita, gibuhat raman nag headband. Definitely pabor gyud ta ana in general, gawas kon naa scientific basis nga kon grabe ka enclosed,” paghulagway ni Rama.
Ang acting mayor niingon nga nausab na ang panahon karon ug aduna nay mga maayong pamaagi pag-manage sa problema sa pandemic.
“ We should be more positive and innovative at the same time kanang mga jurrassic has to be set aside and we have to pursue something new so that tomorrow will be definitely better,” dugang ni Rama.
Si Felix Taguiam, presidente sa CCCI, nagkanayon nga dili sila mohimo og desisyon,maghuwat ra sila sa kamanduan gikan sa Cebu City Government kon ipadayon ba o wagtangon na ang mandatory nga pagsul-ob sa face shield sulod sa ilang mga establishment.
“The chamber does not want to get involved with any medical decision since we are not health professionals. We will just abide what is approved by EO or the DOH lang.We will wait for the EO to come out,” pasabot ni Taguiam. (ANV, PAC)
Gwen mipaluag sa face shield; Mike nag-agad sa mga negusyante
Source: Sonstar
0 Comments