Tungod sa pipila ka mga insentibo alang sa mga tawo nga hingpit nang bakunado, miarang-arang ang gidaghanon sa mga magpabakuna batok sa Covid-19 sa matag adlaw sa Dakbayan sa Sugbo.
Mao kini ang pagtuo ni Atty. James Sayson, deputy sa Local Vaccination Operations Center sa Dakbayan sa Lapu-Lapu, human siya nakabantay sa pagsaka sa gidaghanon sa mga tawo nga nagpabakuna sa pipila ka mga adlaw nga nakalabay.
Matod ni Sayson sa interbyu sa Superbalita Cebu, nga ang pagtugot sa mga kan-anan nga makakaon hingpit nga mga bakunado nakatabang sa paninguha sa kagamhanan sa pagdasig sa publiko sa pagpabakuna.
Laing nakadasig mao ang polisiya sa Department of Labor and Employment (DOLE) nga kadtong mga trabahante nga wa pa magpabakuna di makabalik sa trabaho.
Ikatulo mao ang polisiya sa ubang mga dapit nga di pasudlon sa malls ang mga tawo nga way bakuna.
Lisod usab ang pagbiyahe kon way bakuna o naka first dose ra tungod kay dunay mga dapit nga mangita og RT-PCR test ug uban pang mga dokumento.
Niingon si Sayson nga tungod sa nagkadaghang mga prebilihiyo sa hingpit nga bakunado, napugos ang kadtong nagpanagana ug kadto wa pa ganahi, sa pagpabakuna.
HAPIT
Sa samang higayon, iyang gibutyag nga naa na sila karon sa 75 porsyento sa fist dose sa mga nabakunahan sa target population nga gilatid sa nasudnong kagamhanan.
Sa mga fully vaccinated, duol na sila sa 60 porsyento.
Malaumon siya nga padayong mosaka ang trend sa gidaghanon sa mga nagpabakuna ning mosunod nga mga adlaw.
Samtang alang kang Sayson, di makiangayon nga silutan ang mga local chief executive kon mapakyas sa pagkab-ot sa target sa kagamhanan sa gidaghanon sa mabakunahan.
Matod niya nga gipaabot na nga mominos ang magpabakuna kay kini natukma sa nalantawan ni retired Major General Melquiades Feliciano, Visayas Inter-Agency Task Force (IATF) Covid-19 chief implementer.
Sa samang higayon, gibutyag ni Sayson nga sulod sa tulo ka adlaw sukad ilang gisugdan ang pagpamakuna sa mga menor de edad og 12-17 anyos, dul-an na sa usa ka libo ang natusokan.
Mokabat na sa 911 ang natusokan sulod sa tulo ka adlaw nga pagpamakuna sa Hoops Dome sa dakbayan.
Matod ni Sayson nga sa Hoops Dome ra ang pamakuna sa menor aron di magkayagaw.
Nagpabakuna sa Lapu nagkadaghan
Source: Sonstar
0 Comments