Gipusasan ang usa ka 17 anyos nga gikatahapang drug pusher, uban sa kakunsabo, human sila nakuhaan og dul-an P2 milyones nga shabu sa buy-bust operation sa ala 1:20 sa hapon sa Sabado, Nobiyembre 6, 2021, sa Atillo St., Brgy. Punta Princesa, dakbayan sa Sugbo.
Ang menor de edad, kinsa nag-alyas og KG, usa ka tinun-an sa high school, taga Sitio Tugas, Brgy. Inawayan, dakbayan sa Sugbo, gihulagway nga regional level pusher bisan sa iyang kabatan-on kay makabaligya siya og kinilo nga shabu.
Nasikop sab ang iyang kauban nga si Reggie Sangcadan Delos Santos, 30, alias “Reggie”, e-bike driver, dunay kapuyo, taga Sitio Laguna 1, Brgy. Cogon Pardo, dakbayan sa Sugbo.
Si Police Lt. Col. Randy T. Caballes, hepe sa City Intelligence Unit (CIU) sa Cebu City Police Office, maoy nangulo sa buy-bust operation.
Si Caballes nga nahinabi sa Superbalita Cebu nagkanayon nga si KG ilang gipalitan og drugas nga balor sa P6,000 gamit ang boodle money.
Kini human sa ilang usa ka semana nga monitoring sa menor de edad nga gigamit sa mga sindikato. Nakuha sa possession sa dinakpan ang 255 gramos nga drugas nga mobalor og P1,734,000 base sa Dangerous Drugs Board (DDB) value.
Sumala ni Caballes, nga ang mieor de edad nga dinakpan maka-dispose og usa ka kilo nga shabu matag semana.
Si Caballes mibutyag nga naa sa sulod sa bilanggoan ang kontak ni KG. Si Reggie maoy kolektor sa mga halin sa drugas.
P1.7M shabu nasakmit gikan sa 17 anyos
Source: Sonstar
0 Comments