Mokabat sa 186 ka mga aksidente sa karsada ang average nga mahitabo matag buwan, gikan sa Enero hangtod sa Septiyembre sa 2021, sa Dakbayan sa Talisay.

Sa talaan sa City of Talisay Traffic Operations and Development Authority (CT-TODA), mokabat sa 1,703 ang nahitabong mga aksidente sa kadalanan sa Dakbayan sa nahisgutang mga buwan sa 2021.

Ang labing daghan nahitabo sa Augusto diin nitala ang ahensya og 210. Gisundan kini sa Hunyo ug Septiyembre nga pulos nitala og 107.

Ang labing daghang aksidente naglambigit og taxi batok motorsiklo, diin nitala ang traffic agency og 261 samtang gisundan kini sa mga pribadong sakyanan nga dunay 260.

ARON MALIKAYAN

Si Jonathan Tumulak, pangu sa CT-TODA, sa interview sa Superbalita Cebu, niingon nga sagad sa mga aksidente nahitabo sa N. Bacalso Avenue ug Cebu South Coastal Road (CSCR).

Kasagaran hinungdan sa mga aksidente mao ang “miscalculation” sa mga driver nga kusog nga nakapadagan.

Aron malikayan ang aksidente, si Tumulak niingon nga gikinahanglan ang igong gilay-on sa duha ka mga sakyanan.

“Kon four lanes, kinahanglan two cars ang gilay-on. Kon two lanes o one way, one car. Sagad gud sa aksidente, kanang miscalculation kay duol kaayo ang sakyanan nga nagsunod,” pasabot ni Tumulak.

Sa samang higayon, nipahimangno usab si Tumulak sa mga siklista kay sa Enero ngadto sa Septiyembre, mga 89 ka aksidente ang nalambigitan niini.

Sagad mga bus ang nakaigo sa biseklita, hinuon way namatay.

Si Tumulak niawhag sa mga drayber nga motuman sa tanang mga lagda sa trapiko kay gigama kini alang sa kaluwasan sa karsada.

Iyang gitumbok nga usa sa komon nga nahitaboan sa mga aksidente mao ang mga eskina, diin dunay mga drayber nga motabok aron mo “beat the red light” nga kalapasan usab sa balaud sa trapiko.



Aksidente sa dan sa Talisay nag-average og 186 matag buwan
Source: Sonstar