Posibleng magkaatbang sila si Davao City Mayor Sara Duterte-Carpio ug iyang amahan nga si Presidente Rodrigo Duterte pagka bise presidente sa 2022 elections.
Human sa pipila ka mga adlaw nga paghuwat, si Duterte-Carpio ni-file sa iyang certificate of candidacy (COC) pagka bise presidente hulip kang Lyle Uy sa Lakas-Christian Muslim Democrats.
Human kini nahitabo, si Presidente Duterte nipahibawo nga magpapili usab siya sa pagka bise presidente.
Si manlalaban Reynold Munsayas ni-file sa COC alang kang Duterte-Carpio sa Sabado, Nobiyembre 13, 2021.
Ang iyang tigpamaba nga si Liloan, Cebu Mayor Christina Garcia-Frasco niingon nga ang presidential daughter naa sa Davao.
“This is to confirm that Mayor Inday Sara Duterte, through her representative, has filed her certificate of candidacy for vice president under Lakas-CMD. Mayor Sara will be releasing an official statement shortly,” matod ni Frasco sa usa ka text message sa SunStar Davao.
Si Duterte-Carpio ni-resigned gikan sa Hukbong ng Pagbabago (HNP) sa Nobiyembre 11, samang adlaw sa iyang pagpanumpa sa pagtipon sa Lakas-CMD.
Pipila ka oras ang milabay, sila si Duterte ug Senador Christopher Lawrence “Bong” Go nangabot sa buhatan sa Commission on Elections (Comelec) sa kaulohan aron pag-withdraw sa senador sa iyang COC sa pagka bise presidente.
Human niini, ni-file siya sa iyang COC sa pagka presidente ubos sa Pederalismo ng Dugong Dakilang Samahan (PDDS).
Giisa Presidente ang kamot ni Go human sa filing timaan sa iyang pagsuporta sa dugay na niyang kaabag bisan dihang mayor pa si Duterte sa Davao City.
Apan dihang nanguli na sila, si Duterte niingon nga modagan siya pagka bise presidente.
Sa interbyu sa Superbalita Cebu sa telepuno, si Undersecretary Anthony Gerard “Jonji” Gonzales niingon nga nikompirmar kaniya si Secretary Martin Andanar sa ilang chat.
“That’s what PRRD (President Rodrigo Road-Duterte) said,” kutlo ni Gonzales sa chat ni Andanar kaniya.
Sa iyang nahibaw-an, ang Presidente mo-file sa iyang COC sa Lunes, Nobiyembre 15, 2021.
Sa nangaging mga buwan, si Duterte nipahibawo nga modagan siya pagka bise presidente kon di modagan si Duterte-Carpio. Apan sa mga survey, daghan ang wa makauyon sa plano sa Presidente kay kinahanglan na siyang mopahuway gikan sa pulitika.
Si Duterte-Carpio niingon sab kaniadto nga di siya magpapili sa bisan unsang national position kon ang iyang amahan modagan pagka bise presidente.Ang pagpapili ni Duterte pagka bise presidente dunay suporta gikan sa PDP-Laban Cusi Wing.
Si Go, sayo sa miaging semana, nipasumbingay nga dunay kausaban ug hayan moatras siya sa pagka bise presidente.
Samtang si Partido Demokratiko Pilipino–Lakas ng Bayan (PDP-Laban) presidential bet Senator Ronald “Bato” dela Rosa niatras sa kandidatura pagka presidente. (SunStar Davao, REV)
Duterte vs. Duterte sa 2022 elections?
Source: Sonstar
0 Comments