(UPDATED) GIKOMPIRMAR ni Cebu City Acting Mayor Michael Rama atol sa interview sa sibyaanang dyHP nga mitaliwan na sa laing kalibutan si Mayor on leave Edgardo Labella pasado alas 4 sa kaadlawon sa Biyernes, Nobiyembre 19, 2021.
Si Labella namatay mga alas 4 sa kaadlawon sa Biyernes, Nobiyembre 19, 2021 human sa pakigbugno sakit. Siya 70.
Ang iyang kamatayon gumikan sa “septic shock secondary to pneumonia,” matod sa opisyal nga pamahayag sa pamilyang Labella.
Matod ni Rama nagkaestorya sila sa anak ni Mayor Labella labot sa nahitabo sa iyang amahan.
Tungod niini, putlon ni Rama ang iyang bakasyon aron mobalik sa Cebu City Hall dungan sa mando nga i-half mast ang bandila sa city hall simbolo sa kasub-anan sa dakbayan.
Ang pamilyang Labella, sa usa ka pamahayag, nikompirmar sa kamatayon sa mayor.
“Mayor Labella, who served the City untiringly at the height of the pandemic until conditions improved, lost the battle he waged,” matod sa pamahayag.
Nagpasalamat ang pamilyang Labella sa duha ka mga tambalanan, Cebu Doctors’ University Hospital ug sa Perpetual Succour Hospital “where he spent his last days.”
Sa usa ka press conference sa Nobiyembre 2, 2021, ang pamilya ni Labella nikompirmar nga ang mayor naospital tungod na usab sa pneumonia.
Sa samang higayon, ila usab nga giangkon nga gidala sa intensive care unit (ICU) si Labella tungod sa timailhan sa laing atake sa sepsis.Apan nasanta na usab kini.
Gibutyag usab sa pamilya nga ang mayor dunay cancer sa prostate mga 12 ka tuig na ang nakalabay apan na manage ra kini.
Niadtong Enero ning tuiga, unang na admit ang mayor tungod sa infection sa dunggan.
Sukad niadto, nagsulod gawas na ang mayor sa tambalanan.
Niadtong Oktubre 7,2021, mi-file og indefinite leave si Labella sa wa pa matino nga rason.
Sa Septiyembre 20, ni-file na usab siya og leave human siya makagawas sa tambalanan, diin siya nahungihong nga namatay nga nakaaghat sa pamilyang Labella sa pagluwat og pamahayag na buhi ang mayor, apan nasulod og makadiyot sa ICU sa pribadong tambalanan.
Tungod sa duha ka sunodsunod nga mga leave, si Rama niasumer isip “full mayor” sugod sa unang semana sa Nobiyembre human molapas na sa 30 ka adlaw base sa duha ka sunodsunod nga mga leave ni Labella. (AYB/REV)
Mayor Labella, namatay; Rama, pamilya mikompirmar
Source: Sonstar
0 Comments