LABING minos 21 ang nangatala nga nangamatay ug tulo ang missing sa Metro Cebu atol sa pagkuso-kuso sa bagyong Odette sa Huwebes, Disyembre 16, 2021.

Walo ang kumpirmadong nangamatay sa Dakbayan sa Sugbo.

Si Konsehal Dave Tumulak, chairman sa Cebu City Disaster Risk Reduction and Management Council sa Konseho, maoy unang nipahibawo sa Superbalita Cebu nga adunay unang unom nga nakabsan sa kinabuhi gikan sa lainlaing barangay sa siyudad.

Napun-an og duha ang talaan nianang pagkahapon atol sa dugang pakisusi sa Cebu City Disaster Risk Reduction and Management Office nga gipangulohan ni Ramil Ayuman, Atty. Gerry Carillo sa CCDRRMC ug incident commander retired BFP general Aderson Comar apan gisusi pa ang mga ngalan sa duha.

Ang mga nakalas nga nailhan na mao silang Felipe Medrano sa San Nicolas Proper; Norma De la Cerna, 60, sa barangay San Roque; Derrick Dave Flordeliz, 23; ug Renato Flordeliz, 55 sa Hillsview sa barangay Tisa; Redan Pecori, 12, taga Tisa, naigo sa natumbang kahoy; John Clifford Yaun, 19, sa Lower Villa Zacate sa Basak Pardo; ug Engr. Daniel Dongcoy sa barangay Kamputhaw.

Mga Flordeliz natumbahan sa firewall samtang si Yaun naigo sa kahoy ug si Dongcoy natumbahan sa tower sa telco.

Usa sa namatay nga wa pa ilkhi ang 12 anyos nga lalake sa Brgy. Buhisan nga natumbahan sa kahoy.

STATE OF CALAMITY

Si Mayor Michael Rama niisyo og direktiba sa pagpaubos sa tibuok dakbayan sa state of calamity and emergency.

Apil niini ang mandatory at home orders para sa paspas nga pagbangon sa siyudad sa Sugbo.

Apan way labot niini ang mga medical staff and personnel ug ubang frontliners niining panahon sa katalagman, law enforcement personnel, media personalities, government officials, delivery drivers sa tanang cargo, mag-uuma, fishermen, mga tawo nga magpalit og pagkaon ug building materials,public utility personnel ug uban pa.

Si Rama personal nga nakigtagbo na kadagkuan sa Visayan Electric (Veco) kagahapon, Disyembre 17, aron mapadali pagpabalik ang kuryente sa tibuok Cebu City.

Si Rama nawagan sa barangay officials nga kinahanglan maghiusa niining panahon sa emerhensiya ug ihikling una ang pulitika sanglit aduna ray tukmang panahon para niini

Ang mayor wala pa usab nihatag og kinatibuk-ang danyos sa mga propiedad sa City Hall nga apil sa nakatagamtam sa kabangis ni Odette, produkto sa agrikultura ug mga real property nga nadanyos sa paghaguros sa bagyo.

NADAT-UGAN

Pito ka mga tawo, lakip ang tres anyos nga kaluha, gitaho nga nangamatay sa dakbayan sa Mandaue human natanggong sulod sa ilang mga balay dihang nahugno ang firewall sa usa ka establisemento tungod sa pagkuso-kuso sa Bagyong Odette sa Huwebes sa gabii, Disyembre 16, 2021.

Ang hepe sa City Disaster Risk Reduction and Management Office (CDRRMO) nga si Buddy Alain Ybanez nga nahinabi sa SunStar Cebu nitug-an nga pito ang ilang natala sa Sityo Sudlon, Maguikay tungod sa bagyo.

Giila sa pamilya sa mga biktima nga mao sila si Jose Winnie Enoc, 62; Arnold Enoc, 24; ug Aira Mae, 16, nga nagpuyo sa samang panimalay.

Ang laing upat ka mga biktima nga nagpuyo lang mga tulo pa ka balay ang gilay-on sa tulo ka mga biktima, giilang sila si Emelita Bantigue, 43; Leah Clarus, 36; ug 3-anyos nga kaluha nga sila si Eloiza Dionne ug Elaiza Dianne Clarus.

Sa buwag nga pakighinabi sa head for operations sa CDRRMO, Felix Suico Jr., ang tanang mga biktima napalgan nga wala nay kinabuhi ug nakuha sa ikaduhang andana sa ilang tagsa-tagsa ka balay.

Matod ni Suico nga nakuha nila ang lawas sa kaluha uban sa ilang inahan nga si Leah, mga alas 12 sa tungang gabii niadtong Huwebes dihang nangayo og tabang ang barangay mga alas 9 sa gabii. o alas 10 sa gabii.

Maayo na lang kay naluwas dayon ang laing tulo ka mga miyembro lakip na ang amahan sa kaluha nga nakaangkon og samad.

Si Jun Bantigue, 55, ig-agaw ni Jose Winnie ug paryente sa ubang mga biktima, niingon nga nakadungog sila nga nahugno ang firewall mga alas 7 sa gabii. dihang nabati na ang haguros sa hangin nga dala ni Odette.

Apan si Bantigue niingon nga dili na lang sila makagawas dayon tungod sa hangin ug hapit usa ka oras ang iyang pagsusi sa iyang mga kabanay.

Nakig-alayon ang SunStar Cebu sa management sa Nutri Asia apan nagdumili sila paghatag og pamahayag ning pagsulat.

Sa Dakbayan sa Lapu-Lapu, upat ang nangamatay sa Brgy. Basak samtang duha sa isla sa Olango.

Wa pay gihatag nga mga detalye ang kagamhanan sa Siyudad.

Sa Dakbayan sa Talisay, mga opisyal sa Talisay City Disaster Risk Reduction and Management Office (TCDRRMO) nitaho nga sila nagpadayon sa search and rescue operations sa tulo ka mga mananagat nga missing sa Barangay Tanke dihang ni-landfall ang bagyong Odette sa Huwebes sa gabii.

Mga opisyal sa TCDRRMO nisulti sa SunStar Cebu nga lima ka mga mananagat ang nipadunggo sa ilang mga sakayan sa in Barangay Tanke dihang kalit silang gibanlas sa bawod.

Sa lima, usa ang gitaho nga nalingkawas.

Sa Biyernes sa buntag, Disyembre 17, ang TCDRRMO nakadawat og mga taho nga ang usa sa missing naluwas sa Brgy. Pooc. (PAC, BBT, MKG, JKV)



21 patay, 3 missing ni ‘Odette’
Source: Sonstar